Tin algun mensahe cu a circula riba whatsapp. Dangui Oduber a comenta cu tur e mensahenan aki ta wordo considera como “fake news”. Ningun di e noticianan cu ta coriendo rond ta cuadra e realidad. Segun por trece dilanti ta cu e screening a termina masha dia caba. For di siman pasa caba y te cu asina leu cu tin di compronde, tur candidato cu a wordo presenta como posibel candidatonan pa bira minister, ta ministeriabel. Si esey no ta e caso, lo a tende esaki caba. Pero un biaha mas Oduber a enfatisa cu tur e noticianan, tur e whatsappnan, tur post riba facebook, tur boletin extra pa crea sensacion cu ta wordo treci dilanti na e momentonan aki ta Fake News nan ta pa crea mas bruhamento cu tin realmente, pasobra ta den e etapa final y den e proximo dianan Aruba lo conoce su Gobierno nobo. Ta cuestion di algun ora mas pa e miembronan cu tin den Parlamento entrega nan retiro y pa e miembronan nobo, nan geloofsbrieven wordo aproba y nan drenta sala di parlamento pa nan huramenta como miembronan nobo.
Decisionnan
E parlamentario a sigui splica cu tin decisionnan cu nan no lo bay para tras di dje, si no ta di acuerdo cu nan. Tin decisionnan cu lo por termina den corte. Esaki a sosode den pasado caba caminda cu hopi decision a wordo tuma pa e gobierno saliente di MEP y e gobiern nobo di AVP a para mayoria di e decisionnan pasobra e tempo ey nan tampoco no tabata di acuerdo cu nan. Ta proceso normal di gobernacion cu ora un gobierno sinta, tin e programa di gobernacion, tin e vision pa ehecuta y decisionnan cu a wordo tuma, ta decisionnan cu MEP no ta biba cu nan y por end up den corte.
Nombracionnan politico
Oduber no ta di acuerdo cu ex minister Dowers, pasobra tin cu tene cuenta cu e situacion financiero di pais Aruba. A wordo treci dilanti cu e presupuesto di 2018 tin un deficit di casi 200 miyon florin. Con mas iresponsabel bo por ta como minister demisionario, como ex minister. Mester recorda e ex gobierno aki, cu nan a wordo manda cas. Pueblo a scoge un otro Gobierno. Apesar di esaki como Gobierno Demisionario kier keda pusha hende, haci nombracionnan politico, siendo cu pueblo a core cubo caba. Bo tin un situacion financiero precario na Aruba. Bo tin un deficit di casi 200 miyon florin y bo ta keda bisa cu no, nan ta ministerraad, ministerraad por tuma cual decision cu nan kier. Esaki ta e motibonan pakico e hendenan aki a wordo manda cas. Pa nan iresponsabilidad pa maneha cada florin di e pagado di belasting. Oduber no ta di acuerdo cun’e, cu e ministerraad por tuma cualk decision cu nan kier, cu nan tin e autoridad, pasobra nan ta sigui crea problema pa e proximo Gobierno. Importante awor aki ta, cu e proceso final ta canando y den e proximo dianan tur e bagamunderianan aki ta yega na un final.
Attachments area
