Minister Dangui Oduber, encarga cu salubridad Public tabata presente den e prome conferencia di prensa di Gobierno e siman aki, unda a duna informacion relacion cu e crisis di coronavirus. Ya caba mainta a informa cu Toque de Queda ta keda elimina entrante diahuebs marduga, mientras cu for di awe e ta orario ta cuminsa for di mey anochi pa 5’or di madruga y cu negoshinan por keda habri te 9’or di anochi.
E mandatario a bisa cu desde cu a cuminsa y suavisa e medidanan no tabatin contagion local y a keda na 3 caso positivo, di cual uno ta den Cuido Intensivo. Ta trahando pa habri frontera di Aruba, ta trahando riba protocol pa evita di trece casonan nobo Aruba (of limita), cuminsa na yegada di e bishita na aeropuerto.
Ta controla tur turista cu yega Aruba, ta midi su temperatura, y si nan tin keintura halto, ta haci un rapid covid test cu su resultado ta cla den un ora pa un ora y mei. Si resulta cu e persona ta positivo, mesora e ta bay pa un Covid Hotel (apunta door di Gobierno) y lo keda ey te ora cu test negativo cu por bula bek pa pais. Personal di DVG lo tin personal na aeropuerto cu lo repasa un checklist cu esnan cu ta yega. Esaki pa evita cu un e persona cu ta positivo ta contagia otro turistanan of empleadonan di e hotel.
Aruba ta practicamente cla pa habri, pasobra tin e situacion local totalmente bou di control y tin protocol traha pa tur sector. “Esaki ta pone nos considera un fecha pa habri nos frontera. Esaki ta sona duro pero nos bida mester sigui. No por laga Covid-19 maneha nos bida pero nos maneha Covid,” e mandatario a bisa. Y agrega cu mester mantene un bon higiena y sigui reglanan. Mas tarda pa habri frontera, mas grandi e problemanan lo ta.
