Damage Control di Kustwacht a fracasa: Hues Comisario a laga tur “ilegal” den libertad

Un accion relampago di Kustwacht Aruba, den un esfuerso pa contraresta e criticanan pisa contra nan accionnan y decisionnan, parce di a “backfire” pisa siman pasa. A core organisa un conferencia di prensa invitando medionan selecta (sin 24ora.com) pa mustra con bon nan ta funciona, garando un boto local “Matrialista” cu tabata transportando Venezolanonan cu status ilegal bek pa nan pais. Awo cu a detene nan, trece nan bek, a causa cu Hues Comisario a laga tur 6 den liberdad, hunto cu e 2 tripulantenan local y no a tuma e boto den beslag tampoco.

Ta bisto cu Wardacosta di Caribe Hulandes staciona na Aruba tin un problema serio cu su imagen den comunidad. Publico no ta sostene nan accionnan di ultimo simannan, den cual ta persigui piscadonan local, ta kita nan piscanan, laga nan daña y despues bentanan afo na dump. Mayoria ta haya cu si kita nan mes, pa regala nan na un instancia caritativo, mescos cu semper tabata haci.

Dia 26 di september ultimo, un patruya den un di e botonan Metal Shark di Wardacosta, a dal den e boto di piscado “Mi Mami”. Dos piscado a sigura cu nan a hera muri ora e boto di Kustwacht a dal masha duro den nan boto, lagando un di e piscadonan levemente herida. E boto Mi Mami tabata nabegando cu su luznan cendi, mientras cu e boto di Wardacosta cu 5 tripulante abordo tabata nabegando duro y sin luz!

Riba dje, e mesun Kustwacht nabegando sin luz a dal contra un boto local, sin nunca bin afo acepta nan eror ni pidi disculpa pa nan forma bruto di atende cu nos mesun piscadonan local riba lama. Tur esaki mientras cu di otro banda, tur dia ta scucha di botonan clandestino cu ta yega nos isla cu ilegalnan abordo. E piscadonan local ta sinti cu tin un guera contra nan, mientras cu nos costanan ta hacho habri pa botonan Venezolano.

E ultimo hayazgo tabata Polis mes cu a nota un boto Venezolano biniendo Aruba cu velocidad halto. A warda nan na costa y a gara un grupo di ilegalnan, e boto y tankinan di gasolin yena cu droga!

E ultimo hayazgo grandi di boto cu ilegal y droga abordo, tabata un logro di Cuerpo Policial Aruba cu si a nota e boto yegando riba nan radar. Te ora cu nan a activa y gara e boto y e ilegalnan na tera, e ora Wardacosta a sali pa brinda asistencia. E ta habri e discusion atrobe cu si por confia un solo organisacion cu e radar, pasobra si esun “no mir’e”, mester tin un otro cu si por tin wowonan habri pa botonan yegando cu hende, arma y droga ilegal riba nos isla, enbes di cada biaha controla nos localnan riba ki pisca nan a pisca of pa check e nacionalidadnan (paspoort) di e piscanan cu nan tin abordo!

Haci algo pa “bon” pero toch ta sali “malo”

Den e caso specifico di e boto Matrialista, ta obvio cu husticia no a para tras di e accionnan di Wardacosta, debi cu a comete un eror innecesario, hincando otro departamentonan den mas problema cu nan tin caba. Ora detene Venezolanonan, mesora un hende mester tin “common sense” pa pensa sikiera, unda ta bay cera nan? Ki dia lo deporta nan bek? Ken lo cria nan turestempo? Ken lo paga pa nan hospedahe, alimentacion y cuido medico durante cu nan ta wanta aki?

Ta como cu esunnan na cabes di Wardacosta no ta capas pa contesta e preguntanan aki, cu Hues Comisario a contesta nan tur pa nan, lagando tur 6 Venezolano “ilegal” den libertad condicional, sperando pa ki dia atrobe lo por tin un vuelo humanitario pa pone nan riba dje. Hues Comisario mes a puntra Wardacosta, pakico mester cera e stranheronan aki si nan mes a haci tur lo posibel pa regresa nan pais y cu ta nos mes como pais, esta Wardacosta, a bira detene nan bek y trece nan Aruba. No tabata miho laga nan sigui nan caminda? Awo nan ta sigui liber, no a detene e tripulantenan local mes y e boto tampoco no a haya problema cu husticia.

Nadiuska Santana Marquez, mas conoci como “La Poderosa” pa su rol den e scandal di Patruya 37, saliendo for di un patruya di Polis. E tempo ey a grab’e ta “flirt” cu dos polis den uniform den un patruya. A suspende ambos polis pa algun siman, te cu nan a haya nan trabou bek. Sinembargo, dor di un eror y “powerplay” di Trudy Hassell, awe ainda e señora ta na Aruba. Ora a kere cu autoridadnan porfin a siña un les pa no stroba ilegalnan bandonando nos isla, ta parce cu e hefenan na Wardacosta ta insisti pa pasa den e mesun “berguensa nacional” aki!

A comete e mesun eror cu Trudy Hassell

Algun luna pasa, por corda ainda con Trudy Hassell, tambe pa crea un show mediatico, a bay detene un stranhera, cu a haya e apodo di “La Poderosa” net na momento cu e tabata saliendo for di Aruba pa Venezuela. E hefe di Warda nos Costa kier a mustra su poder, a laga graba riba video con e ta papia cu e ciudadano, zundr’e y encarcel’e pendiente su deportacion. No a dura mucho cu e “ilegal” a entama un caso den Corte, den cual Hues Comisario a ordena su libertad condicional, bisando cu e no tin risico pa huy, debi cu e tabata bayendo caba pero cu ta Warda nos Costa mes a strob’e di bay! Parce cu te ainda e ta na Aruba, sin cu nunca mas a regresa su pais natal.

Den e caso di Matrialista, e hefenan na Wardacosta no kier a keda atras y a comete e mesun blunder di Trudy Hassell, esta pa detene stranheronan cu ta bayendo nan pais caba. Ta zona mas logico pa gara nan ora nan ta yegando (drentando) Aruba y no ora nan ta bayendo bek caba. Como tal, Corte a tuma e mesun decision cu La Poderosa y a laga tur e 6 Venezolanonan liber pasobra nan a demostra nan intencion di bay, pero ta parce cu Aruba mes no kier pa nan bay!

Esaki ta e boto di piscado local “Matrialista”, cu Wardacosta a para y trece bek tera. A haya dos tripulante local y 6 pasahero di nacionalidad Venezolano, cu nan maletanan regresando nan pais. A trece nan bek Aruba, entrega nan na Warda Nos Costa cu intencion di cera nan. Sinembargo, Hues Comisario no ta mira necesidad pa cera hende cu nan mes kier a bay nan pais. Tampoco no a mira necesidad pa tene e boto den beslag ni pa persigui e dos Arubianonan como tripulante.

Negoshi nobo: Hopi Venezolano kier regresa nan pais

No ta un secreto cu ultimo lunanan, tin un demanda grandi di Venezolanonan cu ta dispuesto pa paga 300, 400 y hasta 500 dollar pa un boto di Aruba hiba nan mita caminda, via lama, pa Venezuela. Ey un otro boto Venezolano ta tuma nan riba lama y hiba nan costa na Punto Fijo. De facto, tanten cu e boto Arubiano no drenta teritorio Venezolano, nan no ta cometiendo nada robes. Di otro banda, si nan ta transportando pasahero abordo, nan mester pasa waf di Barcadera prome pa “klaar uit” via Migracion, locual probablemente nan no ta haciendo.

No tin suficiente avion pa hiba tur ilegal bek

E reto di mas grandi actualmente ta cu tin indicacion cu lo mester tin mas of menos 15 mil Venezolano cu status ilegal na Aruba. No ta hende cu a bin ayera, sino for di e ultimo 5 añanan mas of menos. Nan a drenta Aruba via Migracion, a stempel nan paspoort y nunca mas a sali. E pregunta e ora ta, cuanto vuelo lo mester conduci for di Aruba pa Venezuela pa transporta tur e ciudadanonan aki bek? Ta mas cu claro, cu esunnan cu ta mas desespera, ta dispuesto pa paga loke sea pa yega nan pais bek, mirando cu aki na Aruba nan no ta mira un futuro por lo pronto.