Diadomingo mainta pasa di 11:00am a sosode un accidente den cercania di rotonde di Ex-Drive Inn na Kibaima. Ora cu Polis di trafico a yega na e sitio, a detene e dama latino cu ta e chauffeur cu a causa e accidente. E tabata bebi y riba un trip cu un amiga y un amigo mas.
Polisnan a hib’e Warda di Polis na Shaba pa mas investigacion y interogacion. Durante investigacion a resulta cu tur esunnan den e auto ta stranhero y no por a prueba cu nan tin un status legal riba nos isla. Cu e realidad aki riba mesa, Polis a dicidi di detene tur tres y hiba nan Warda di Polis pa mas investigacion y verificacion.
Warda nos Costa lo sigui e proceso pa confirma nan status riba e isla, debi cu nan tin acceso na e data di DIMAS. Segun fuente, e dama deteni cu a causa e accidente ta e mesun dama cu a bira famoso den e caso di “Patruya 37” na Noord, ora cu un video di dje y un amiga papiando cu dos Polis a causa nan suspension. E biaha aki e ta den noticia cu foto y tur, pero deteni pa causa accidente burachi.
