Curso Exercise is Medicine diabierna awo specialmente pa esnan den e sector di salud

Diabierna awo, dia 16 di augustus, ta bay tin un curso na Renaissance cu ta hiba e nomber “Exercise is Medicine”. E curso aki ta designa pa dokternan di cas, specialistanan, y personanan cu ta traha den e ramo di medicina.

Pakico ta haci e curso

Ehercicio ta hopi importante pa nos curpa, pa nos por mantene no solamente nos curpa fisico saludabel, pero tambe pa nos salud mental.

Dr. Steven Croes di Ibisa a amplia kico ta Exercise is Medicine. E ta conta cu e ta un programa di salud cu a nace na 2007 door di American College of Sports Medicine y tambe door di American Medical Association. Su iniciativa ta pa inclui deporte, como actividad fisico como algo standard den tratamento medico y tambe den e proceso di cuido di pashent.

DVG Topico di Siman: Ehercicio ta medicina

Posted by 24ora on Monday, August 12, 2019

Ta pidi tur personal di salud pa mira cual ta e actividad fisico cu cada persona ta haci y a base di esaki prescribi, mescos cu e dokternan ta prescribi remedi pa trata malesa, prescribi cierto actividad fisico, manera un receta medico.

For di 2007 te cu 2019, Exercise is Medicine a bira un iniciativa global. Awendia ta haya mas cu 40 pais rond mundo cu ta participa den e programa aki.

E lema prinicipal ta Ehercicio Fisico ta un Bon Medicina.

E cuater pilarnan di e programa aki ta, cu nan ta bay sinti henter e personal cu ta bay atende e curso aki pa midi cua ta e actividad fisico di cada persona cu ta bay haya e tratamento aki. Despues di esaki, e idea ta pa a base di esaki nan por guia, instrui, duna conseho na e personanan cu no ta haciendo actividad fisico, con nan tin cu haci e actividad fisico y e personanan cu no ta cumpliendo cu esaki.

WHO ta bisa cu 150 minuut pa siman, ta prescribi esaki den forma di un receta medico.

Pakico

Nos por mira cu hopi pashent ta wordo instrui pa bay haci actividad fisico. Pero hopi biaha ora nan sali for di un hospital of clinica di un dokter, nan no sa precies kico pa haci. Un pashent diabetico cu haya su mes cu e problema aki, sa cu tin cu haci actividad fisico. Pero su gran pregunta ta, kico e tin cu haci. Nan ta drenta un gym y nan no sa unda pa cuminsa.

Ora cu tin prescripcion medico cu ta bisa kico tur tin cu haci den actividad fisico, ta bira hopi mas facil y comprendibel y ta un assessment cu ta un tiki mas dirigi riba condicion di cada pashent.

E curso aki ta asina importante pa tur persona cu ta den e area di salud, por asisti. E di cuater pilar di Exercise is Medicine ta cu unabes un persona a ricibi e prescripcion cu ehercicio, e prescripcion aki ta basa riba cada pashent, nan ta referi na cierto gruponan na Aruba cu ta dedica na deporte.

Ibisa ta un di e gruponan cu ta haci esaki y tambe tin otro stakeholdernan cu tambe ta bay participa den e evento aki.

E agenda

Dr. Maritza Ordoñez di parti di Departamento di Salud Publico (DVG) a haci un resumen di  evento cu ta bay tuma luga diabierna awo. Tin dos orador invita riba medicina deportivo y tambe tur loke tin di haber cu actividad fisico.

E idea ta cu berdaderamente tin varios partner cu ta bay asisti na e curso. Entre nan tin personal di Ibisa,  di AZV, hospital, como tambe di DVG, dokternan di cas, specialista, y hasta gymnan, cu ta bay t’ey presente.

E registracion ta cuminsa pa 7’or y mey di mainta. Ta cuminsa na midi glucose, di presion, ta bay wak peso, haltura, e masa corporal y despues di esey ta bay tin un apertura cu e minister di salud publico kende tambe ta apoya e curso aki.

Importancia di e curso

Kier pone mas hende den conocemento, e profesionalnan mes, cu unabes papia di Ehercicio ta medicina, e idea ta cu ta cu enbes di remedi, ta pasa pa ehercicio. Of tambe, unabes cu bo ta haci ehercicio, por kita tableta.

Esaki ta specialmente pa pashentnan cu diabetes. No ta un secreto cu tin cuater malesa na Aruba cu ta hopi halto. Tin diabetes, caminda cu dos aña pasa tabata tin 8 mil persona cu diabetes y por ta awo ta hopi mas. Tin personanan obeso y tambe tin personanan cu presion y colesterol halto.

Door di esaki, e risico ta keda y a base di esey, Fundacion Movemento ta Bida, hunto cu mas otro partner, a bin cu un proposicion pa pone mas hende sa, kico ta e importancia di ehercicio.

Unabes cu un persona cuminsa haci ehercicio, bo ta cuminsa mira e diferencia mesora. Bo ta libera proteina, endotoxina for di bo celebro cu ta yudabo pa drumi bon. No solamente come saludabel ta importante, pero bo tin cu combin’e. Si bo come saludabel y no ta haci ningun tipo di movecion, no ta realmente yuda. E idea ta pa haci un combinacion completo di loke tin di haber cu comemento saludabel y ehercicio na banda.

Esey ta e motibo pakico ta bin cu e curso aki na Aruba y door di e profesionalnan cu ta pone den practica, e idea ta pa un futuro hopi cerca, ta cuminsa prescribi di un receta, na luga di remedi, ta pone ehercicio.

Ehercicio no tin limite pa ningun hende. Un hende cu ta riba cama, tambe por haci ehercicio y p’esey tin e fisioterapeuta.

Un grupo cu tambe ta bay tey presente durante e curso aki, ta e POHnan. Nan tin mas control, mas contacto cu e pashentnan cu ta por ehempel diabetico, pa pone nan riba un solo liña, pa no uza mucho remedi, sino come na un manera corecto y ehercicio, segun dr. Ordoñez.

E curso

E curso ta bay ta den 2 idioma, esta na Ingles y Spaño. E gruponan ta dividi den e dos idiomanan aki. Costo ta 125 florin pa e costo, cual tin cu bisa cu e curso ta completamente sold out.

Cu e curso aki ta pa fomenta e gruponan cu ta participa pa sali riba caya y trece e informacion na comunidad.

Comments

comments