Biblioteca Nacional Aruba ta ofrece un curso cortico di skirbimento ‘Creative nonfiction’ na september. E curso tin duracion di 6 siman. Esaki ta tuma lugar na biblioteca na Playa.
Instruccion ta na Papiamento y Ingles y ta bou guia profesional di Writing coach Deedee Baarh. E curso ta costa 125 florin pa persona. Su nivel ta avansa (level 2). E curso ta cuminsa diaranson dia 4 di september y ta sigui dianan 11, 18 y 25 di september y dia 2 y 9 di oktober, tur sesion ta di 5or pa 7or. registracion por via [email protected] prome cu diabierna dia 23 di augustus.
Creative nonfiction ta basa riba e experencianan y memorianan unico di e autor. E ta pa conta un storia berdadero uzando obhetonan creativo y tecniconan di skirbi di fiction y poema. E ta un mescla perfecto entre e echonan real y e personal. E ta un storia berdadero skirbi den un manera bunita y interesante. No-ficcion Creativo por tuma diferente forma manera; Travel writing, personal essay, lyrical essay, memoir, autobiografianan, journalnan of blog post pa menciona algun. Esaki ta interesante pa tur esnan cu ta gusta skirbi di nan propio experencia y ta desea di post, blog of publica di otro forma pero e por keda priva tambe den un journal.
Deedee Baarh a completa su Bachelor’s degree na University of Central Florida y su Master’s na City College of New York den Creative Writing y tin experencia amplio den diferente area di creative writing, proofreading y editing.
