Curaçao Medical Center a kuminsá risibí su mobilario

Hospital Nobo Otrobanda ta informá ku e proseso pa muebla e edifisio a kuminsá. Ta trata aki di kamanan i demas mobilario pa Curaçao Medical Center.

E kamanan nobo pa Curaçao Medical Center a yega segun e skema palabrá i ya for di siman pasá a kuminsá pone nan den nos hospital nobo. E proseso akí lo kontinuá durante e próksimo dianan. Ku esaki nos hospital a drenta rekta final.

Ku yegada di e kamanan akí i vários mobilario mas, e programa di ‘Wegwijs in CMC’ pa e empleadonan di SEHOS ku lo pasa pa Curaçao Medical Center ta bira ainda mas eksitante. Aki na algun siman ta inougurashon di e hospital mas moderno di Karibe, ku ta alabes e hospital ‘state-of-the-art’ mas nobo den Reino Hulandes. Pronto e empleadonan lo drenta e fase di simulashon pa prepará nan pa traha i presta di un forma responsabel den Curaçao Medical Center ku ta programá pa kuminsá operashon promé ku fin di aña.

Aparte di matras- i e kamanan ku ta keda instalá den e diferente kambernan, tin tambe e kamanan di konsulta, mesita di nochi, stul i demas atributo ku ya a kuminsá pone na nan lugá manera e portrètnan athunto ta ilustrá. En total a yega 263 kama di hospital kumprá serka e distribuidor Arjo. Próksimo simannan lo sigui traha ku determinashon pa asina tur loke mester keda kla pa inougurashon ta na lugá.