Ya pa shete aña konsekutivo CURA DOET a yuda, entretantu, míles di organisashon rònt Kòrsou. Naturalmente esaki no por a ser realisá sin e apoyo di e miles di boluntario ku tur aña di nobo ta duna nan sostén.
E aña aki Curaçao Cares, huntu ku Oranje Fonds i Reda Sosial, ta bolbe pidi henter komunidat pa duna un man durante CURA DOET 2020, riba 13 i 14 di mart! “Ainda tin hopi kos pa hasi” segun projectleider Vicky Trinidad. Nos ta sumamente orguyoso di e miles di boluntarionan ku a duna un man den e último añanan.
E di shete edishon di CURA DOET ta pinta di bira atrobe un edishon hopi grandi. Ku un total di 310 diferente organisashon sosial, inkluyendo organisashonan di bario, di skout, di deporte, di grandinan i hopi skol rònt Kòrsou, a inskribí pa djabièrnè 105 tarea òf aktividat i pa djasabra 266. Tin un total di 371 proyekto ku awor ta buskando mas ku 3,500 boluntario pa djòin nan durante CURA DOET dia 13 i 14 di mart 2020. E nesesidat di CURA DOET ta kede krese. Den 2014, e promé biaha ku a organisá e akshon na Kòrsou, e tabata un éksito rotundo. 2600 hende a partisipá pa kumpli ku 132 tarea i aktividat. E aña aki e kantidat a bira dòbel mas tantu. Aworaki, faltando un luna i mei mas pa e di 7 edishon, nos ta hasi un yamada pa boluntarionan inskribí masalmente pa adoptá un proyekto k’un grupo.
Boluntarionan por mira tur e tareanan i aktividatnan riba www.curadoet.com i por inskribí komo individual òf grupo. Durante e edishon aki di CURA DOET, banda di e famoso slogan “Dun’un man, gan’un kurason!” e aña aki ta den ambiente di “Hasi bon, ta sinti bon”. Ku esaki nos ke pone e enfoke riba e balor di trabou boluntario i e partisipashon di nos komunidat kompletu i espesialmente lokual esaki ta nifiká pa e boluntarionan ku ta duna un man. E momentu a yega pa huntu nos pone man na obra. Huntu nos ta logra mas. Nos ta konta ku bo, pa huntu nos realis’é! No tarda, Kòrsou mester di bo yudansa! Skohe bo proyekto faborito i inskribí bo mes awor komo boluntario riba www.curadoet.com.
