Entrante dia 1 di april 2020, Gobierno di Reino Hulandes a emiti un VISA obligatorio pa Venezolanonan cu kier bishita Aruba, Boneiro, Corsou, Sint Maarten, Sint Eustatius y Saba. Pa aplica mester acudi na Embahada di Reino Hulandes na Caracas y un compania priva cu lo haci e “intake”. Pero, locual Gobierno no a menciona ningun biaha ainda ta e retonan cu a pone pa haya e VISA aki pa por bishita nos isla.
Locual mester informa ta cu e VISA ta costa 80 Euro mientras cu e compania cu lo procesa e peticion ta cobra un otro 27 Euro. Bisando esaki, e aplicacion ta costa 107 Euro cu ta mas o menos US$ 122,00 pa cada aplicacion. Probablemente esey ta mas cu e pasashi mes pa bula pa Aruba.
Tin un lista di condicion pa por bin Aruba, mayoria financiero den cual e aplicante mester por comproba cu e ta bin Aruba pa vakantie y no pa bin purba keda of traha. Pa esey e mester tin un bon entrada y fondonan necesario pa cubri pa hotel y estadia na Aruba.
Tene cuenta cu e aplicacionnan actual di “invitacion” for di un Venezolano cu permiso na Aruba of di un Arubiano invitando un Venezolano ta sigui normal. E cambio ta si cu enbes di haci e aplicacion na Migracion den Vondellaan cu lo mester aplica na Departamento di Asuntonan Huridico di Gobierno.
Consecuentemente, e carta “apostilla” aki di Gobierno di Aruba ta bay na e aplicante na Venezuela cu mester presenta esaki na Embahada ora di solicita pa un VISA.
Sinembargo e reto mas grandi ta cu Gobierno di Reino lo emiti solamente 8 mil VISA pa tur 6 isla den Caribe Hulandes. Esey ta pone cu den bon tempo Aruba tabata conta cu por lo menos 250 mil turista Venezolano cu eseynan lo no yega nos isla mas pasobra e cuponan lo ta hopi limita. Excepcion lo tin pa tur Venezolano cu tin VISA Mericano, nan por drenta Aruba sin ningun restriccion.
E maneho nobo aki lo ta casi igual na tene e portanan cera pasobra cu e cuponan asina limita, no ta conoci si aerolineanan lo pone asientonan disponibel pa vuelonan pa islanan ABC y SSS pasobra e cantidad di Visanan lo ta asina poco cu ta mas o menos 666 asiento total pa luna pa parti den tur 6 isla, pues un averahe di 100 asiento pa luna pa cada isla. Claro cu Aruba y Corsou probablemente lo haya mas debi na demanda pero asina mes e lo ta masha poco compara cu e scenario normal.
