Scol di Musica Rufo Wever ta orguyoso di invita henter e comunidad di Aruba na un celebracion special pa inaugura su cas completamente renoba cu un concierto inspirado y gratis pa publico. E anochi memorabel aki di musica y union comunitario lo tuma luga diadomingo, 7 di september 2025, di 7:00 PM pa 8:30 PM na e localidad nobo di e scol na Vondellaan 6, Oranjestad.
Despues di casi seis decada remarkabel formando talento musical den e murayanan di Cas di Cultura, Scol di Musica Rufo Wever ta cuminsa un capitulo nobo y emocionante. Como cu Cas di Cultura ta preparando pa un renobacion grandi, e scol di musica a haya un hogar nobo. Desde 1 di Juli 2025, a tuma posesion di e propiedad na Vondellaan 6 pa transform’e den un edificio moderno y adecua pa un scol di musica. E mudansa aki ta marca e comienso di un era nobo, yen di oportunidad pa crecemento y innovacion.
E gerencia ta hopi entusiasma cu e posibilidadnan cu e localidad nobo aki ta brinda. E expansion lo permiti e scol amplia su curiculo, cu plannan pa introduci cursonan nobo y relevante manera produccion musical, laboratorionan instrumental y un variedad mas grandi di ‘ensembles’ durante siman. E paso importante aki ta sigura cu e scol por sigui enrikece e panorama cultural di Aruba pa e futuro generacionnan.
“E cas nobo aki ta mas cu un edificio; e ta e fundeshi pa e proximo generacion di musiconan di Aruba,” e director di e scol a expresa. E espacio aki ta permiti nos amplia nos vision, y nos ta ansioso pa comparti nos musica y nos pasion cu e comunidad cu semper a sostene nos.”
E concierto di celebracion, cu lo tuma luga net e anochi prome cu e aña escolar cuminsa, lo ta un bunita presentacion di e talento di nos scol. E anochi lo conta cu un serie di presentacion di studiantenan talentoso, docentenan dedica, y algun artista y musico invita. E ta priminti di bira un anochi inolvidabel di melodia y celebracion.
Publico amante di musica di Aruba ta keda cordialmente invita pa uni na e celebracion, conoce e facilidadnan nobo y disfruta di e talento increibel cu ta defini Scol di Musica Rufo Wever. Lo tin bebida refrescante y snack disponibel pa benta.
Detayenan di e Evento:
Fecha: Diadomingo, 7 di September 2025
Orario: 7:00 PM pa 8:30 PM
Localidad: Vondellaan 6, Oranjestad
Entrada: Gratis
Dress Code: Tropical Casual
Nos ta warda boso!
