Ultimo dianan aki, Polis ta controlando mas pisa pa chauffeurnan burachi. Aunke Polis a adverti di trempan y hasta tene campañanan di conscientisacion pa sali cu un “amigo Didi”, toch e cantidad di detencionnan ta keda halto. Y locual mas ta nota ta cu ta topa cu chauffeurnan patapata burachi tras di stuur. Ta te despues di detencion, e ora mayoria ta lamenta nan acto, pasobra e ta bin cu consecuencia, tanto financiero, penal, laboral, personal, social, hudicial y sin lubida di reputacion!
Ley ta stipula cu na momento cu Bo supla y haya mas cu 220 uitgeademd lucht ug/l den bo rosea, ta considera Bo burachi. Esey ta e limite. Tin biaha sa topa chauffeurnan cu apenas a pasa e limite, cu Polis por “kijk door de vingers” y laga un otro hende stuur pa Boso yega cas sigur. Pero, asina cu surpasa e nivel di 570 ug/l Bo ta den problema. Na e nivel ey ley ta duna Polis derecho pa kita Bo rijbewijs! Den casonan asina ta keda na Fiscal di Ministerio Publico pa dicidi si ta duna Bo e bek den 10 dia of si ta kit’e te ora Bo caso yega dilanti Hues. Eynan e decision no ta mas den man di Ministerio Publico sino den man di Corte.
Hopi biaha chauffeurnan no ta realisa den ki problema nan ta hinca nan mes dor di comete e delito aki. Ta t’e ora e consecuencianan presenta nan dilanti nan ta “bin bij”, aunke tin ora ta laat caba. Pa cuminsa ta detene Bo, tin biaha dilanti Bo famia, ta sali den prensa, cu tur consecuencia pa Bo trabou y reputacion. Nan ta kita Bo rijbewijs, cu hopi biaha ta parti di Bo trabou, dus atrobe problema. Bo ta haya multa cu tin biaha por ta riba 2 mil florin, cu ta placa cu probablemente Bo no tin gespaar pa paga boet. Si Bo yega Corte, e ta bay riba Bo strafkaart. Si bo roga Fiscal pa no manda Bo dilanti Hues, e por pone condicion cu Bo mester drenta AA obligatorio pa “kick af” di bebemento, banda di un multa. Hopi hende ta acepta esey pa evita di perde nan rijbewijs.
Cambio di ley di trafico
E ley nobo di trafico a pasa den Parlamento na aña 1999 y a drenta na vigor na aña 2000. Pues awor nos tin 20 aña cu e sistema profesional den cual Polisnan ta uza un “Alco Sensor” pa midi e nivel di alcohol den bo rosea. Uzando e nivel aki, ta pone un maneho mucho mas cla pa Polis, Fiscal y un Hues pa castiga e acto criminal aki (misdrijf).
Antes y awo
Prome cu aña 1999, e sistema tabata masha anticua. Polisnan tabata uza formulanan bieu pa demostra si un chauffeur ta burachi of no.
Por ehempel:
- Cana stret riba un liña
- Tira un debchi na suela y Bo mester a sak cohe
- Pone bo wijsvinger na bo nanishi
- Sinta den un stoel di palo parecido na un auto y bo mester a brake ora e luz cora cende Bo dilanti
Separa di e testnan aki, Polis mester a puntra cuanto ba bebe, unda, ki alcohol, di ki ora, si Bo a come e mainta ey, kico bo ta corda y asina por sigui menciona. E procedura penal tabata encera paginanan di Proces-verbaal den cual Hues mester purba haya un idea di con burachi e chauffeur tabata a base di e declaracion y pruebanan haci. Awendia e proceso ta bay hopi mas profesional, eficiente y facil dor di uza e nivel cu bo supla. Claro ta haci Bo algun pregunta pero e prueba di e test ta determinante.
Conseho:
Pa evita tanto problema cu husticia, gosa Bo carnaval manera Bo kier….pero no stuur si Bo ta bay bebe. Bay cu un hende cu NO ta bebe, pa laga e stuur pa Bo ora di bay cas. Corda cu ningun hende por stroba Bo gosa carnaval na Bo smaak, basta cu Bo bebemento no causa desgracia na otronan despues. Pesey, sinta Bo nechi den banda y asina keda leu di problema.
