Minister Andin Bikker a presenta awe pa responde riba un yamada urgente di Parlamentario Rocco Tjon di e Fraccion di MEP den Parlamento, relaciona cu locual e ex Polis a cataloga como mina e autoridad policial riba nos isla. E tabata kier ta sigur cu Minister ta consciente di kico ta pasando y con Hulanda poco poco ta tumando husticia over riba nos isla. Pa straño cu por zona, e mesun Fraccion di POR no a presenta y RED a yega na final di e reunion, pues tabata un discusion entre AVP y MEP contra Minister Bikker.
E mandatario a presenta cu un representante di Warda Costa di Caribe Hulandes mientras cu Cuerpo Policial tambe tabata presente hunto cu e mandatario. Un di e miembronan di Top di polis ta e propio casa di Rocco Tjon, cu tambe tabata sinta na e otro banda di mesa.
Durante e reunion awe e mandatario a splica di e susedido di ayera, ora cu pa falta di comunicacion, por poco tabatin enfrentamento cu bala entre Militarnan trahando pa Warda Costa y Polis. Ta resulta cu Polis a pidi yudansa di Warda Costa pa un accion. Di otro banda Warda Costa a solicita sosten di Cuerpo di Marina Real. Polis ta bisa cu nan no tabata na altura mientras cu Warda Costa ta insisti cu si a informa adelanta. Danki Dios cu nada lamentabel no a sosode.
E problema ta cu Minister Andin Bikker algun luna pasa a cambia su maneho den cual a haci e caminda pa pidi “zachte bijstand” hopi mas facil y eficiente. En bes cu mester bay Gobierno y te na Gobernador, cu nan mes por solicita ayudo na e Comandante. Ta obvio cu e sistema aki no ta funcionando optimal awor pasobra e cuerponan arma ta tene accionnan paralelo banda di otro. Asina caba algun luna pasa RST y Polis tabata tap e mesun sospechoso den un caso di droga y dado momento a topa “nan cu nan” mes den e combersacion. Esun obviamente no tabata sa kico e otro tabata haciendo cu consecuenia cu henter e investigacion a cay den otro.
Minister Andin Bikker a duna Ministerio Publico un instruccion verbal awe pa para e forma di traha aki y bay bek na e sistema di antes, unda ta yama pidi permiso prome. E mandatario a sigura awe despues di e reunion, cu na tur momento Polis ta mantene liderazgo di e tipo di accionnan asina. El a enfatisa cu militarnan no tin poder hudicial riba nos isla!
Hecho ta si cu Gobierno di Hulanda ta haciendo tur intento pa poco poco mina den e independencia hudicial di nos pais. Ya caba na e base militar na Savaneta a construi un edificio grandi y moderno pa Koninklijke Marechaussee, pa Recherche Samenwerkings Team, pa Servicio di Inteligencia Militar y pa Kustwacht. E ultimo aki ta purbando pa haya mas autoridad pa nan mes conduci investigacionnan relaciona cu asuntonan di Warda Costa. Te cu awor, ora nan detene hende riba lama, nan mester pasa e sospechosonan pa Polis pa nan sigui cu e investigacionnan. Den nan plan, kier haci e trabou ey na Savaneta Kamp mes, mientras cu K-MAR ta purbando di tur forma pa tuma Migracion y Warda nos Costa over tambe.
Parlamentario Robert Candelaria a sigura despues di e reunion di ta siguiendo e desaroyonan aki di cerca. E no ta kere cu tabatin tanto urgencia pa MEP a core yama e Minister aden. Mas bien e Fraccion di AVP ta sinti cu mester tin problema atrobe den coalicion, cu Parlamentario Tjon a pidi presencia di Minister awe mesora pa un asunto interno entre Polis y Warda Costa.
Criticonan politico a bisa awe despues di e reunion cu tin ora ta crea e impresion cu tin Parlamentario kier sinta riba stoel di Minister. De facto, cu tanto yamamento di reunion urgente, na final nada a bin afo y ainda no ta conoci ken a comete e eror, sea ta Polis of ta Warda Costa ni tampoco con bin tabatin un malcomprendimento di e forma aki. E pregunta ta cu si ta Parlamento mester mete awor den asuntonan di maneho diario den aparato hudicial of ta un midimento di poder tin entre MEP y POR.
Esaki no ta prome biaha cu e lider di Fraccion di MEP ta yama Ministernan di POR cu urgencia den Parlamento pero na final nada ta sosode toch. Asina a yama Minister Otmar Oduber pa duna cuenta riba e asunto di Serlimar y mudamento pa Pos Chikito, siendo cu den e reunion mes tampoco nada a bin afo.
