Nos conoce un sistema cu un historia largo, unda cu bo ta studia bo borchinan y cantidad di cos mas pa bo haya bo rijbewijs. Awo Cuerpo Policial ta biniendo cu un proyecto diferente, mirando e demanda cu tin pa pasa rijbewijs.
Awor aki tin un cantidad hopi grandi di hende pa nan pasa nan rijbewijs. Polis mester ta bon prepara pa asina cumpli cu e demanda aki. Cos lo bay cana mas suave, cu mas hende presente y bo ta haya bo rijbewijs mas rapido.
Liliana Rasmijn, vocero suplente di Cuerpo Policial, ta splica cu esaki ta un proyecto cu tin un tempo caba ta tumando luga. Un tremendo team cu a forma den e organisacion di Cuerpo Policial mes. Tin tres dia cu lo bay anuncia riba e proyecto piloto aki, cual ta dia 27 di Februari, 25 di Maart y 27 di Maart, lo ta e prome fase.
Manera cu a menciona caba, e ta un proyecto piloto. Na unda cu ta bay pone pa dia 60 candidato, cu lo bay pasa examen di rijbewijs B. Den e tres dianan aki, un total di 180 hende lo pas’e. Ta un forma hopi mas facil. E preguntanan ta keda mesun cos, e borchinan, e parti di mesa, etc., lo pasa pa e parti digital. Ta e parti di mas importante y mas nobo cu ta bezig ta dunando pueblo di Aruba awor aki, pa asina den futuro e ta bira algo hopi mas lihe.
No mester warda lunanan largo mas.
E sistema nobo
E sistema nobo aki ta bay via computer, segun Rasmijn. E ta bay ta e parti teoretico. E tin un duracion di 45 minuut. E parti practico ta 30 minuut. Si bo pasa e examen, bo por haya bo rijbewijs di biaha. E ta algo sumamente eficiente. Demanda ta grandi pa rijbewijs di awendia.
Tempo di warda
E wardamento toch ta un tiki largo, pero si e proyecto aki bay bon, di pasa 60 hende pa dia, no lo bay tin e parti di retraso mas. Ta e parti di Cuerpo Policial cu ta pensa den un era nobo di digitalisacion cu ta mas avansa y mas miho tambe.
Lista di espera
Segun Rasmijn no tin mucho hende mas riba e lista di espera. Antes e tabata hopi mas. A reorganisa e parti di rijbewijs, unda cu a bin mas hende nobo y eficiente, unda cu ta pone awor aki cu e ta bay un tiki mas lihe. Tur cos bo mester bay cu e demanda. Hopi biaha hopi mas hende kier nan rijbewijs awor aki.
E controlnan ta dunando fruto. No ta facil pa haya un hende sin rijbewijs, bo sa caba pa ley bo ta haya boet y nan por bay cubo tambe.
Espacio pa renobacion
Si bo sa cu bo rijbewijs lo caduca, controla bo rijbewijs y bay na e oficina di rijbewijs, bo por hay’e di biaha. Wak ki papelnan bo tin mester, saca potret y despues di warda un rato, bo ta haya bo rijbewijs.
Presentacion
Aña pasa Cuerpo Policial a duna e rijschoolnan un presentacion pa asina nan por prepara bon nan candidatonan. Den e pilot project, e rijschoolnan lo inscribi nan candidato pa sigui e programa aki.
Acomodacion
E examen lo ta pasa den MFA na Santa Cruz. Eynan tin e computernan cla pa asina e candidatonan dia 27 di Februari, por pasa nan prome examen teoretico. E parti teoretico ta 45 minuut. Ta purba di hinca 10 hende cada biaha. Pa dia e ta cubri 60 participante. Manera cu e parti teoretico keda cla, ta pasa pa e parti practico di 30 minuut.
Multiple choice
E examen lo ta mas facil. Si a siña e preguntanan, e lo bay bira tiki mas facil. Lo bo mira di biaha e contesta. No ta algo fuera di lo normal. E preguntanan lo bin den multiple choice y riba computer.
E prome tres dianan ya anuncia lo bay ehecuta e proyecto piloto. Despues ta bay sinta hunto, pa wak kico ta e fayo, of kico e rijschoolnan mes ta bisa. Na final, ora cu e candidato haci e parti di proyecto piloto aki, lo e haya un formulario unda e lo yena kico el a haya bon y menos bon, pa loke ta e sistema.
