Diaranson atardi a tuma luga apertura di korpsviering 2022 na POVA , caminda un grupo grandi di polis tabata presente pa forma parti di e ceremonia aki. Inspecteur in opleiding, David Leer recien eligi como voorzitter di comision korspviering, a duna algun informacion di kico tur por spera di e actividadnan programa pa e celebracion.
Ademas di e actividad deportivo, ta prepara tambe pa e celebracion religioso cu lo tuma luga na Iglesia Maranatha na Playa Pabou. Hunto cu esaki tin diferente preparacion pa actividad di sport como tambe preparacion pa un grupo cu lo biaha y cu lo representa Aruba den exterior.
Despues di algun aña sin cu e celebracion di e korspdag/korpsviering aki a tuma luga, e biaha aki tin cu bisa cu tur cos ta bayendo sublime. Un entusiasmo hopi grandi entre cada participante tras di cada sport cu nan lo forma parti di dje.
Leer a agrega, cu e comision ta nobo, e ideanan tambe ta nobo y ta locual a haci un diferencia e biaha aki. Tambe a logra reactiva algun actividad deportivo cu semper tabata gusta, pa asina cada un bira e antesala pa e celebracion di e korpsdag mes, cu ta uno religioso. E animo t’ey y ta uno hopi grandi.
Riba red social por a mira algun invitacion y grupo animando otro pa participa, cu sigur ta un bon plataforma pa propaganda pero tambe pa mustra e entusiasmo cu ta biba den e siman aki pa cu e korpsviering.
E meta di e siman di actividad en berdad ta pa trece cada districto hunto, den actividad deportivo caminda nan por topa cu otro y algun di nan cera conoci cu colega nobo y asina crea miho amistad cu otro.
Hopi biaha colega ta traha cu otro den esfera laboral y den e siman aki ta haya chens pa comparti cu otro den un ambiente diferente, haya oportunidad di conoce otro y asina trece union den e cuerpo.
Dedica na Eufemio ‘Cuchi’ Thielman
Apertura a tuma luga un poco prome cu 5:00 pm, caminda diferente districto a forma parti di dje. Cada grupo, cu nan color corespondiente y algun cu slogan copioso y chistoso pa representa nan team. Tambe presente tabata t’ey e altocomisario nobo Ramon Arnhem , altocomisario interino Irma Gordon y diferente miembro di e comision organisatorio.
Durante ceremonia a hiba palabra altocomisario Gordon, cu a dedica algun palabra di gradicimento y reconocimento na Eufemio ‘Cuchi’ Thielman, polis pensionado cu un trayectorio excepcional den Cuerpo Policial di Aruba.
Eufemio Thielman, naci na Boneiro, biba na Corsou y despues pa mayoria di su bida a traha, biba y a forma su famia aki na Aruba. E ta casa cu señora Maida y tin cinco yiu; Maritza, Baron, Renso, Richi y Jigo Thielman.
E siman di korpsweek ta dedica na su persona y su gran aporte na Cuerpo Policial di Aruba. Cuchi a ricibi aplauso grandi durante ceremonia y a keda masha gradicido pa e honor. Hunto cu famia, nan a ricibi e plakkaat y asina haci apertura di e siman di polis.
Invitacion na comunidad
David Leer cu un invitacion no ta solamente na colega, pero na pueblo general, pa bin duna nan sosten na cada polis di e diferente districtonan cu lo enfrenta otro den actividad deportivo, pa mustra nan talento, pero tambe un invitacion na e comunidad pa mira e otro cara di polis ademas di esun cu ta sirbi su pais. Pa mustra e union cu ta reina den cuerpo policial.
