Cuerpo Policial a rindi homenahe na ex-colega Alex Arends riba su cumpleaños nr. 70

Diahuebs tabata dia di cumpleaños di un ex-polis y awo pensionado pa dies aña caba, Alex Edwin Arends. Su ex-coleganan a bay tur cu tin bou di sirena pa su cas p’asina felicit’e pa su cumpleaños number 70.

Pa Arends, e no tabata por a describi e sentimento di con el a sinti ora cu el a scucha e sirenanan y wak su ex-coleganan yega su cas pa dun’e pabien. Hopi biaha ta sinti cu unabes cu nan bandona Cuerpo Policial, ta lubida riba nan. Pero awo tin un fundacion cu si ta corda riba nan. Y t’asina mester ta.

“Hopi di e muchanan cu ta polis awo tabata su pupilonan, cu el a percura pa nan haci nan trabou manera mester ta. Loke el a logra hinca den nan, awe e ta mira e frutonan di esaki,”Arends a bisa. El a bisa cu ainda e sa bay POVA, pero door di su salud, e no ta sali mucho mas. Otro caminda e no sa waknan, pero ainda toch tin algun di su ex-coleganan cu nunca a bandon’e y ainda nan ta bishit’e.

Semper tin un grupo cu ainda ta tene contacto cu ne. El a bisa cu e tin dies aña afo, pero den su mente ainda e ta polis. Un conseho cu e tin pa esunnan cu kier bira polis ta pa nan tin un vocacion berdadero, un polis mester ta amigo di e pueblo, no manera antes. Polis mester ta e amigo, e sirbido y mester yuda.

Un conseho cu semper el a bisa su pupilonan: Asistencia cu proces-verbaal y servicio. Un polis mester ta simbolo di ayudo.

“Nunca lubida e parti humano, e polis mester purba pone su mes den sapato di esun cu ta den problema”. Dos cos masha importante c’un polis semper mester tene cuenta cu ne.

Lito Lacle, vocero di polis, a cuminsa na bisa cu ta for di aña pasa, a cuminsa na recauda fondo unda cu cada miembro activo di Cuerpo Policial cu kier contribui ta pone p.e. 5 florin pa luna. Y desde prome di januari 2023, tur polis cu a bay cu pension for di Cuerpo Policial y cu ta biba na Aruba, lo haya un bishita di parti di e comision hunto cu e coleganan pa, un biaha mas, rindi un sorto di homenahe y desea e persona cu a haci aña hopi aña mas di bida.

Nan no tin un lista di tur e coleganan cu a bay cu pension y si tin cualkier familiar cu tin un polis a bay cu pension, por manda e datonan pa Cuerpo Policial. Loke e fundacion kier ta pa dedica un tiki tempo na e ex-coleganan aki. Hopi biaha e polisnan cu a bay cu pension, practicamente ta lubida riba nan. Loke e fundacion kier aworaki, ta pa recorda nan. Hopi di nan a dedica mas di 40 aña na Cuerpo Policial y loke kier haci awo ta pa trece nan bek, rindi homenahe y duna nan balor necesario.

E idea ta pa, tur colega cu a bay cu pension for di Cuerpo Policial  biba na Aruba y cu ta haci aña, e fundacion y e coleganan cu ta desea esaki, por bin compaña e fundacion pa duna e persona aki su honor mereci despues di cu e persona aki a rindi mita di su bida na Cuerpo Policial.