Cuerpo di docente y gran parti di personal di sosten di Colegio Arubano no ta sostene e directiva

1492

Den un declaracion manda pa prensa e docentenan di Colegio Aruba ta duna un bista di loke ta an preocupacionnan pa loke ta sosode na e instituto aki pa basta tempo caba. Diferente reunion a tuma luga entre e docentenan, siembargo no tabata kier a duna un comentario official na prensa te cu awo.

Den un carta manda pa prensa nan ta bisa cu pa medio di esaki, nan kier expresa nan preocupacion relaciona cu e crisis cu directive di Stichtig Voortgezet Onderwijs Aruba (SVOA). Nan ta bisa cu e ultimo simannan a bira cla via medio social y den prensa cu ta reina un incertidumbre na Colegio Arubano. Como docente nan kier expresa nan preocupacionnan tocante e desaroyonan aki cu, particularmente, e mayornan di e alumnonan y e comunidad en general.

Pa un cantidad di aña caba ta reina un aña insatisfaccion y intrankilidad na Colegio Arubano. Na augustus di aña 2018, porfin a haya un rector Arubiano, cu a gosa di confiansa di e cuerpo y cu a cuminsa cu e tarea pisa cu animo nobo. Ni dos aña despues, e ta entrega su retiro ya cu traha cu e directiva actual, SVOA, ta imposibel. Esaki tabata e di 9 rector cu Colegio a conoce den 8 aña. Acerca, e docentenan ta experiencia, den forma progresivo, e metemento di e directiva, cu no tin niun afinidad cu enseñansa, riba tur nivel. “Esaki tin un influencia negativo riba e scol, e docentenan y sigur e alumnonan. E parti ‘gezellig’ a bay perdi, e actividadnan social a disparce, pasobra mester bezuinig, ta inverti poco den material di les y demasiado den cosnan cu no tin nada di haber cu Enseñansa,” e docentenan ta denuncia.

Banda di esaki, e docentenan ta preocupa con ta uza e contribucion di mayor y e fondo di boekenfonds. Desde 19 di december 2019 ,e mesun directiva a funda un stichting, esta Stichting pro SVOA, cu ta maneha tur placa di scol (subsidio, ganashi di actividad, regalo, contribucion di mayor, fondo di boekenfonds, donacion, herencia, honorario). E stichting aki ta parti di e directiva actual di scol, esta SVOA. Den cuadro di transpariencia y bon gobernacion, esaki ta un desaroyo extremadamente straño. Meta di institui Boekenfonds tabata primeramente pa yuda e mayornan cu e gastonan di buki door di huur esakinan.

“Ora cu 75% di bo cuerpo di docente y mayoria di e personal di sosten na e scol ta duna di conoce cu nan no tin confiansa den e directiva actual, e situacion di trabou ta bira uno insoportabel. Y esaki lo refleha bek riba e animo cerca nos alumnonan, cu no merece! E cuerpo di docente y gran parti di personal di sosten, no ta sostene e directiva aki y p’esey nos ta sinti nos mes yama pa tene accion tanten cu e directiva actual ta nenga di entrega nan renuncia.”

Nan ta finalisa bisando cu Colegio Arubano, unda hopi ciudadano a pasa nan añanan di enseñansa avansa cu placer, merece un directiva transparente y sigur miho!