Cuerpo di Bombero ta e departamento mas afecta den pandemia

Durante conferencia di prensa yama pa Sindicato di Bombero di Aruba (SINBA) a haya informacion riba e peliger, e situacion penoso cu Cuerpo di Bombero a of ta bibando ainda aden durante henter e temporada di crisis di corona. Segun Davni Roza, Cuerpo di Bombero ta e departamento cu a pasa mas malo. Nan a tira nan cu piedra, klinker, kibra windshield. For di maart cu a drenta den estado di calamidad, brandweer post no tabatin ni television pa por wak noticia.

A menciona cu ayera (diamars atardi) a tende cu Sindicato lo tene su rueda di prensa, a yega seis television na e post di Tanki Flip y awe mainta den pura a sacanan.

Cuerpo di Bombero di Aruba ta den un incertidumbre masha grandi mes, te cu awe no tin idea kico ta bay pasa. No tin maneho, nada concreto den Brandweer. A sinta for di aña pasa y presenta e problemanan cu tin, manera falta di uniform, truck den mal estado, edificio, bluskleding, material adecua pa traha cu ne, no tin material di reserva, no tin taira di spare, magazijn ta plat, den un solo palabra Bombero ta plat.

Cu tur esaki riba papel a informa Minister di Husticia, Gobierno di Aruba, Parlamento, como tambe Gobernador di Aruba. Den reunion di Parlamento a presenta (cu prueba) e situacion y nan a keda babuca. Con por ta posibel cu ta bin parlamento pa informa cu e situacion ta bon mientras cu ta completamente lo contrario.

SINBA ta expresa nan malcontento cu maneho den Brandweer

Posted by 24ora on Wednesday, September 9, 2020

No ta un secreto, cu mester a bira creativo, lucha manera cu por, por ehempel cu e bleki di pif paf pa por start un truck di Bombero. A yega asina leu cu a drenta reclamo cu Brandweer ta tarda pa yega asistencia, pero e realidad cu nan ta aden ta pone cu esaki ta socode. Algun di e trucknan ta tarda pa start cu ta haci cu nan ta yega laat.

Mester a bay te na Minister un biaha mas pa asina invit’e na cada post pa e por wak den ki situacion nan ta trahando, cu a logra haya handschoen y handsanitizer. E ta dificil pa sali for di bo cas y bin haya bo den un porkeria. Baño no ta traha, stoelnan kibra, no tin watercooler. Un situacion inhumano. Un biaha mas, ora a tende cu ta bay yama rueda di prensa a yama hende pa bin drecha watercooler.

Segun Sindicato, nan tin un bon comunicacion cu Minister y manera nan yama nan ta haya oido, pero Bomberonan ta demotiva pasobra aunke e Minister ta bisa cu e ta fada di e situacion, e no ta carta den e asunto. E no ta actua y ta haci cu tur trahado na Brandweer ta cansa y FADA!

Locual ta e situacion di bevordering tambe ta un situacion cu tin hopi hende cansa. A logra pa dos persona den leiding, cu a menciona anteriormente, haya nan bevordering (promocion) pero miembronan cu tin mas di 28 aña den servicio no por keda cla, algun for di 2014 cu te ainda no a logra cu nan. Y e situacion ey ta locual tin hopi hende disgusta. 

Leiding ta trahando pa leiding y Bomberonan ta trahando pa leiding, esey ta e situacion, ta lcoual Roza a bisa. Si wak bon, ta leiding ta e uniconan bon bisti, ta drecha pa nan mes, gasta placa cu no tin pero mientrastanto Brandweer ta core cu un cuenta pa mas di tres aña atrasa.

Situacion ta basta serio, edificionan ta deplorabel tanto na Tanki Flip como na San Nicolas, blafon ta cay abou y asina por sigui menciona. Si compara e gasto interno cu tin pa cu leiding na vehiculonan caro cu nan ta core aden ta mas halto cu e gastonan di Bomberonan mes.