Tres auto a accidenta debi na falta di luz di brake di un auto

Den oranan di atardi tabatin un accidente den cadena na Savaneta y tur pa motibo cu e luznan di brake di e prome auto no tabata traha.

Diamars rond di 2.30 merdia a scucha varios zonido fuerte na e crusada dilanti Mariniers Kazerne na Savaneta.

Segun por a compronde na e sitio, e vehiculo dilanti a brake, pero e luznan di brake no ta traha. E KIA Picanto color bruin a dal un brake di golpi y a pone cu e Hyundai color shinishi a bin dal su tras y un Toyota Tercel a dal patras di e Hyundai.

Mesora a pidi presencia di polis di trafico cu tabata cerca y a cera un parti di e caminda p’asina por a cuminsa cu e investigacion.

A pidi presencia di ambulance debi cu e chauffeur di e Hyundai ta keha di basta dolor. A pidi e compania Mota manda e ekipo necesario pa haci e caminda limpi, debi cu basta azeta a basha riba e caminda y cu por a bira un peliger pa otro automobilistanan.