Arubaanse Voetbal Bond a organisa un conferencia di prensa caminda a informa cu un biaha mas Aruba lo tin representacion den e evento mundial, esta Football for Friendship. Tur aña un delegacion ta bay den exterior pa participa na e evento, debi na e pandemia ta hacie imposibel pa e bay door na manera custuma.
E lo bay door e aña aki pero den un forma virtual, International Friendship Camp – Grand Forum y e E World Championship lo tuma luga dianan 27 di november te cu 10 di december proximo. Un total di ochenta pais lo participa den e evento aki. Durante e evento, hobennan ta siña diferente tecnica di futbol y tambe balornan di bida. E ta un un evento pa hobennan entre diesun te cu diescuater aña.
E aña aki, Dyon Kelly y Sundari v/d Linden lo representa Aruba den e categoria di hungado. Gionne Davelaar den e categoria di young coach y Jaydonn Nicolaas pa e categoria di young journalist.
Durante e conferencia, Sheqayli Ascencion a hiba palabra tambe, el a conta cu algun aña atras el a representa Aruba den e evento cu a tuma luga na Russia. El a desea e participantenan hopi exito durante e evento.