Un atake di granada a keda registra banda di 6’or y 40 di mainta diasabra, na e warda di polis di e bario San Jose, ubica den e caya 40B conecta cu carrera 21B na Baranquilla.
E comandante di polis Metropolitano di Baranquilla, Mariano Botero Coy, a confirma cu cuater agente uniforma a fayece den e atentado, cu mas di 10 persona a resulta herida y cu a logra e captura di un sospechoso.
E prome versionnan ta señala cu tabata tin hende cu tabata mobilisa riba un brommer, a laga e artefacto explosivo na e luga, unda, na e momentonan ey, e agentenan tabata realisa e formacion matutino.
Autoridadnan a cordona e zona y a realisa labornan di evacuacion y inspeccion pa establece si ta existi mas explosivo rond di e warda di polis.
Sospechoso captura
Tras di e atentado cu explosivo na e warda di polis, mientras tanto a reporta captura di un persona, relaciona cu e hecho unda cu e cuater agentenan a fayece.
Durante un rueda di prensa, general Mariano Botero Coy, hefe di polis Metropolitano di Baranquilla, a informa, cu debi na un reaccion rapido, varios polis a captura un homber cu tabata cerca di e luga di e atentado.
“Nos a cuminsa haci e investigacionnan corespondiente cu ministerio publico, nos ta spera cu den un corto plazo por duna ainda mayor resultado cu e captura aki, cu tabata danki na alerta cu e polisnan cu tabata na e luga di hecho y a observa un persona sospechoso, cual nan a detene y a haya obhetonan sospechoso manera un radio y anotacionnan cu informacion policial,” e general a informa.
E comandante di Polis Metropolitano a bisa cu e sospechoso a wordo traslada di inmediato na e instalacionnan di Unidad di Reaccion Inmediato di Fiscalia unda el a wordo hudicialisa y den e prome oranan e lo wordo presenta den audiencia dilanti un hues di garantia.
