Diahuebs 11 di januari 2018 e balor di un Dollar Americano na mercado paralelo na Cucuta a yega 168,470 Bolivar “Fuerte” Venezolano. E moneda Bolivar Fuerte di coper y otro metalnan manera esun riba e potret adhunto ya no ta wordo traha pasobra ta costa mucho mas pa trahe. E “balor” monetario di un bolivar ta increiblemente abou, US$ 0.0000059. Nos florin di Aruba tin e balor di US$ 0.57. Como souvenir, e monedanan di bolivar tin mas balor cu un florin.
Pero si nos por a yega na un banco na Caracas y cumpra e cantidad di bolivar di metal pa un dollar, con nos lo por a transporta nan? E biyechi di dollar nos ta saca di nos cartera. Pero 168,470 bolivar! Ta dificil pa imagina asina tanto moneda. Con por representa e cantidad di bolivar aki? Laga mi purba cu algun ehempel.
Casualmente, mi tin 5 bolivar di metal di aña 2007. Nan cinco riba otro ta midi 12mm. 500 moneda lo midi 1.2 meter. 168,470 moneda di un bolivar = (168,470/500) X 1.2 meter = 404.32 meter. Mas cu e circumferencia di un veld di futbol!
Segun “reglanan” di arkitectura, un piso den un edificio highrise ta 3 meter. Pues e cantidad di bolivar cu balor di djies un dollar Mericano poni riba otro ta manera un highrise mas halto cu un edificio di 134 piso!
E “Bolivar Highrise” lo ta entre e skyscrapernan mas halto di mundo. E famoso Empire State Building na ciudad di New York ta apenas 381 meter y ta conta cu 102 piso.
Un comparacion cu algo local: E edificio mas halto na Aruba ta Riu Palace Hotel (exConcord di 1977) cu tin 18 piso y ta midi 60 meter. Mester pone mas di 6 Riu Palace Hotel riba otro pa yega e haltura di e ”Bolivar Highrise”.
Ki tragedia tristo pa un nacion cu nos tur a aprecia y stima, y pa su hendenan! E moneda di e pais cu tin e reserva di petroleo mas grandi di mundo ta sufriendo e desbaloracion mas grandi den mundo. Esaki ta e logro di socialismo di siglo 21! Hyperinflacion cu ta haci tur hende pober, elimina e clase medio, laga hendenan sufri di hamber y causa morto di hopi pa falta di nutricion y remedi adecuado. Aruba, tene cuidaou!
Skirbi pa Clyde Harms
