Cu radar, boto y avion Kustwacht ta intensiva vigilancia di frontera pa entradanan ilegal

1093

Hopi ta puntra of cuestiona e control continuo cu tin na costa di Aruba door di barconan di Kustwacht. A papia cu Hulanda a manda nan pa evita entrada di ilegalnan cu por ta contagia cu e virus COVID-19. Pero tambe tin hopi speculacion riba e tension cu tin den lama Caribe entre Merca y Venezuela. Sinembargo Kustwacht a manda un informe pa prensa den cual nan ta bisa of enfatisa cu e tarea cu nan ta cumpliendo cu ne ta pa evita entradanan di forma ilegal, haciendo uzo di radar, boto y avion.

Den e informe ta bisa cu intensificacion di cuido di frontera di e islanan ABC ta sigui. Kustwacht hunto cu Defensa intensivamente ta sigui patruya rond di e islanan Aruba, Boneiro y Corsou. Nan ta splica cu e cuido amplio di e fronteranan a cuminsa pa evita entrada di personanan indocumenta cu por ta contagia cu coronavirus. E posibel fuentenan aki di COVID-19 por trece un peligro grandi pa e poblacion di e islanan si nan drenta e islanan di forma incontrola.

Kustwacht ta bisa cu ta conoci cu e botonan cu e hendenan ta uza pa biaha ta den un estado cu ta laga di desea. “Lama Caribense ta hopi bruto y intraducibel, mientras cu continuamente ta transportando demasiado hende abordo di e botonan chikito cu tur e riesgonan cu esaki ta trece cu ne. Den pasado y recientemente, famianan a perde familiarnan durante e biahenan den lanchanan cu no ta apto pa subi lama. Kustwacht ta adverti e hendenan pa no haci e biahenan aki,” e comunicado di Kustwacht ta menciona.

Ta wordo splica cu tin tur sistema “in place” pa evita cualkier entrada ilegal. E sistema di radar ta den completo operacion, y ta haciendo uzo di unidadnan di lama y aereo di Kustwacht y Defensa pa tin mas grip riba e fronteranan maritimo.

Asina por ehempel tur patruyanan di Metal Sharks ta haya apoyo di militarnan Caribense pa haci e control y vigilancia aki 24 ora pa dia y 7 dia pa siman. E patruyanan amplio aki tambe ta vigila e costa pa transporte di droga ilegal, migracion ilegal, traficacion di ser humano y contrabanda di arma.