Cu pistol y cuchiu a atraca truck di cuminda marduga

Diaranson marduga pa 3:15am a tuma luga un atraco na Well Done Snack Truck situa na e rotonde di Las Americas, dilanti di Cas di Cultura. Polis a informa cu ta trata di 4 hende homber cu cara tapa, cu a presenta riba empleado di e truck cu arma di candela y un otro un cuchiu. Tur 4 tabata bisti na preto y ta papia papiamento bon.

Segun informacion suministra dor di Polis, e atracadonan a logra horta no menos di Afl. 8000,=. Despues di a horta e placa bou menasa cu arma, e atracadonan a logra huy den un auto marca Daihatsu modelo Terrios color blauw/berde direccion Dakota.

Polis a saca tur su patruyanan riba caya pa busca e ladronnan pero sin mucho resultado.

Ta pidi ken cu por a mira algo of sa mas di e atraco aki of di e atracadonan envolvi, pa yama tipline di Polis na 11141.