Cada un bishita di sorpresa ta trece un alegria, algun lagrima y hopi recuerdo cerca ex-colega polis na momento cu Fundacion Balora Polisnan Pensiona presenta y dedica un rato na cada pensionado cu a laga e cuerpo di polis debi na pensioen, pero cu den nan mente y curason…keto bay nan ta polis!
Cu cada hacimento di aña ta prepara mas cu por pa e ta sorpresa aunke algun di nan a cuminsa spera esaki caba. Cu masha emocion ta comparti un brindis, pasa palo y combersa un rato di e bon tempo cu nan a pasa hunto den servicio di Cuerpo Policial Aruba.
E luna di februari ta sigui yena di felicitacion, reencuentro, bon deseo y hopi colega di bishita cerca nan ex-colega polis como sorpresa riba nan fecha natal. Esaki ta locual e fundacion nobo di amigonan polis, Fundacion Balora Polisnan Pensiona, encarga cu diferente actividad, ta haci casi diariamente.
Den caravana ta yega hunto na cas di nan ex-coleganan y demostra cu un gesto y dedicatorio cu ainda, mescos cu semper, nan ta aprecia tur nan aña di servicio, nan amistad y ta bin celebra hunto cu nan un rato pa canta “happy birthday” y haci un bishita cortico.
E zonido di sirena a cuminsa haya un otro significativo pa hopi cu a traha, dedica y laga e trabou na momento cu a alcansa edad di pensioen. Algun te hasta ta spanta keriendo cu ta algo a pasa cerca di cas.
Albert ‘Tico’ Winklaar
Dia prome di maart 1882 a drenta den servicio di Cuerpo Policial y a sirbi 37 aña y mey na e pueblo y na e cuerpo. A traha ta ultimo y gran parti di su carera den e departamento forensico (Bureau Forensisch Tecniche Osporing BFTO). Den rango subinspector.
Winklaar a conta tambe cu ta masha hopi storia por conta di 37 aña pero algo cu sigur a keda marca pa semper den henter su trayectorio como polis. Hopi biaha polis ta enfrenta tur tipo di situacion pero gran mayoria di nan no ta esunnan di mas agradabel. Mientras ta atende cu investigacion, ta biba cu hende den nan momentonan mas dificil y algun a yega di expresa cu nan no kier strob’e, ni molestia cu tanto yamada di follow up.
Di su banda Winklaar a keda corda esaki y a bisa cu esey ta su trabou, cu e ta consciente cu en berdad na momento cu polis presenta, nunca e ta pa un momento feliz. Cu e preparacion ey den mente, a traha y asisti den full su carera policial.
Tico Winklaar a cuminsa den e departamento di BFTO na momento cu esaki tabata situa na warda di polis bieu, despues a muda esaki pa Frankrijkstraat y na final a bay Centro di Husticia na Macuarima caminda el a traha ultimo.
Winklaar tin bon recuerdo di e departamento y di tur colega cu el a traha cu ne, tanto den BFTO como departamento di recherche, cu ta esun cu mas cerca tabata di nan departamento debi na e casonan cu nan lo mester a colabora pa soluciona.
Ademas di polis,Tico Winklaar tin recuerdo como reportero, cu ta un etapa prome cu drenta den servicio. Cu masha bon amistad ainda cu ex-colega di radio Angel Coronel di tempo di radio Carina. Tambe e la traha na aña 1976 na conocido corant e tempo ey, La Prensa.
Tico no a pensa di haya e bishita di su ex-coleganan como cu tabata fin di siman pero e sorpresa a yega asina mes y di cual e ta masha agradecido mes.
Lau Figaroa
Hopi ta esunnan cu a conta un of otro anecdota cu e ex-colega, cu tambe mescos cu e otronan, a duna hopi aña di servicio y dedicacion na su pais. Un mentor pa hopi den cuerpo policial y un persona trankil cu hopi pasenshi. Si acaso e rabia anto ta algo basta grandi mes lo a tuma luga.
Figaroa ta biba algun stap leu di warda di polis na rotonde di Noord, caminda unidad motorisa ta ubica na e momento aki. Y ta eynan mes un grupo grandi a presenta pa dun’e su sorpresa bon mereci.
No obstante cu e salud no ta duna mucho, por a mira e alegria y sonrisa ora su ex-coleganan a canta y felicit’e riba su dia. Ultimo caminda cu Lau a traha tabata na strand politie caminda sigur hopi ta cord’e ainda. Un dia sigur cu lo keda warda pa semper den su curason y den di su famia.
Varios bishita mas yena di emocion
Algun polis pensiona mas cu a ricibi bishita e ultimo dianan aki na nan cas tabata Willy Croes, Lisa Paskel y ex-comisario Koisy Krozendijk. Cada un cu un tiki lagrima scondi entre e sonrisa na momento di mira cu e aprecio cu ainda nan ta warda pa nan.
E detayenan aki ta locual pa hopi ta conta mas cu cualkier otro regalo cu nan por a haya. Esaki ta e reconocimento cu nan ta mira, cu ainda despues di a sali di Cuerpo Policial di Aruba, caminda gran parti di nan bida a bay dedica na sirbi nan isla, nan ex-coleganan ta corda riba nan y ta balora nan amistad y conseho durante tanto aña trahando hunto.
E fundacion
Un grupo di polis a forma Fundacion Balorando Polis Pensionado pa honra esunnan cu ta of ta bay bira pensionado. E fundacion ta 100% independiente di Cuerpo Policial di Aruba y ta un non-profit foundation.
Emiliano Baarh, presidente Fundacion Balorando Polis Pensionado, a splica den su casi trinta aña di servicio, el a mira hopi di su coleganan cu awe ta pensionado y tin un aprecio pa nan. El a haya e idea di forma un fundacion pa duna y mustra e aprecio p’e grupo ey.
E fundacion ta consisti pa Emiliano Baarh como presidente, Anushka Harms como tesorero, Ludy-June Wix como secretario, Roberto Brown, Pedro de Verona Kock, Annette Patterson, Jamal Courtar, Zulaica Mitchell y Beverly Akins ta miembro di directiva. E miembronan cu ta forma parti ta haci esaki den nan tempo liber den forma boluntario. Nan meta principal ta pa reconoce e polis cu a baha cu pensioen siendo polis pa reconoce nan ora di haci aña of ofrece un atencion den caso si bira malo.
Homenahe na bida
Ta intencion pa sigui demostra aprecio na e polisnan pensiona, siendo na bida. Despues cu fayece no ta bale la pena mas pa mustra aprecio. Door di haci un bishita cortico y entrega un regalo simbolico ta un muestra chikito di cuanto ta balora nan y ta stima nan. Hopi biaha e grupo tin e tendencia di sinti nan mes lubida. Pero di e forma aki ta dedica atencion na e grupo specifico aki.
