Dialuna atardi e ekipo di Baseball di Aruba, cu a duna un tremendo presentacion na e Campeonato Mundial di Little League Baseball cu a tuma luga na Williamsport, Estados Unidos, a yega Aruba. Na Aeropuerto Internacional Reina Beatrix, Prome Minister mr. Mike Eman hunto cu Minister di Deporte mr. Gerlien Croes den nomber di Gobierno, a duna e sub-campeon international un caluroso bonbini.
Prome Minister Eman, cu un sentido grandi di orguyo y admiracion, a remarca con e talento di e hobennan di un isla, por surpasa e factor cu nos ta un isla chikito. Pa Gobierno esaki ta un momento pa reconoce nan logro pero tambe transmiti e sentido cu Aruba a convivi cu nan durante cada wega. A pesar cu nan a titula sub-campeon internacional, cada stap ta un stap mas cerca di triunfo.
Durante e campeonato na Williamsport, Minister Gerlien Croes a biaha pa Merca y a firma un acuerdo cu e organisacion di Little League World Series pa na 2027 organisa e campeonato mundial aki mes na Aruba y lo ta bunita si Aruba por bay cu e titulo maximo aki mes na cas.
Pa celebra e logro grandi di e hobennan aki, Gabinete AVP-Futuro a organisa un parada pa celebra hunto cu e pueblo di Aruba. Inicialmente, mirando cu e hobennan tabata basta cansa, despues di a duna nan maximo esfuerso durante e ultimo partidonan, y e biahe cu a dura varios ora, a opta pa tene e parada cortico pero mirando e expectativa pa celebra hunto cu e hobennan, a opta toch pa haci e ruta mas largo y pasa den e cayanan di San Nicolas y caba e parada na Centro di Bario Dakota.
Gobierno di Aruba, cu un sentido profundo di orguyo, ta felicita e hobennan, e ekipo tecnico, e mayornan y tur esunnan cu a forma parti di e exito di e ekipo aki.
