Cu gol di Jayceline Boekhoudt ekipo di La Fama ta empata cu RCA

E campeonato regular di AVB pa loke ta e division di femenino, a yega su final pa loke ta e bueltanan eliminatorio y e cuater ekiponan cu a logra clasifica pa hunga e serie semi final, ta Britannia na prome luga cu 35 punto, sigui pa RCA cu 32 punto, La Fama cu 29 punto na di tres puesto y Riverplate cu 24 punto.

La Fama y RCA a hunga nan ultimo encuentro contra otro y e wega a bin termina den un empate di 1-1 despues cu den e prome buelta e dos ekiponan tambe a keda empata na 4-4. RCA a keda e unico ekipo cu no a conoce derota den e campeonato regular aki mientras cu La Fama den di dos buelta tampoco a conoce derota logrando 6 triunfo y e empate contra di e tricolornan di Solito.

La Fama a inicia e partido contra di RCA cu Hadassah Kock den gol, defensa a wordo forma pa Avril Maldonado, Francien de Windt, Nicole Garcia y Shaqiera Rodrigues.Den medio campo a hunga Edriana Molina, Jayceline Boekhoudt, Aljesha Sweetnam, Jeyceline Werleman y Shadira Croes mientras cu den atake a fungi Yenhifer Huntington.

Den di dos tempo La Fama a haci dos cambio caminda Roshyna Werleman a drenta na luga di Edriana Molina y Stecey Lampe a drenta na luga di Jayceline Boekhoudt ambos den medio campo.
For di prome pitaso di referee e dos ekiponan a hiba un bataya forma contra otro den medio cambo pero sin mucho accion dilanti e golnan y den e parti final di e periodo aki, RCA tabatin un leve dominio.Den di dos tempo RCA a presiona tempran buscando un gol pero defensivamente La Fama a funciona bon pero na di 53 minuut tabata e delantero di RCAm Izaline Angela kende ta probecha di un fayo defensivo y ta logra pone su ekipo dilanti 1-0.

Despues di e gol RCA a trata di pusha pa mas gol pero poco poco La Fama ta reacciona y cu a cuminsa busca e gol di empate y ya na di 61 minuut tabata e medio campista Jayceline Boekhoudt kende ta penetra den defensa di RCA y riba un pase di Shadira Croes ta logra di anota e gol di empate y algun minuut despues e mesun hungado aki a haya otro bon oportunidad di anota pero ta pasa e bala banda di gol.

Peligernan di RCA tabata mas tanto riba tironan di skina cu tabata cruza dor di e area penal di La Fama sin cu tabatin intervencion di e defensa pero na ora cu tabatin mester, portero Hadassah Kock un biaha mas tabata domina e accionnan.

No a cay mas gol den e periodo aki y asina e wega a bin termina den un empate di 1-1 den un wega hopi disciplina di ambos banda y sin incidente. La Fama a logra un tremendo actuacion e campeonato aki despues di a supera varios cambio den e ekipo y a bin ta hungando c’un ekipo relativamente hoben pero cu hopi determinacion pa logra un bon resultado.