Diasabra, den oranan di anochi, den un forma relampago, Arestatie Team a persigui y detene un sospechoso moviendo den un auto den area di Noord. A pidi refuerso di patruyanan di Noord, pa por a para un auto coriendo den un forma basta sospechoso riba caya cu dos homber aden.
Yegando Saliña Cerca, pasando Turibana, Kamay, e unidad di Arestatie Team a duna señal na e auto aki pa para. Na e momento cu esey a sosode, e auto a mira cu autoridad ta su tras. Nan a lora drenta un caya y na e momento cu nan a mira un chens, a baha pa purba di core y a cuminsa core direccion di e saliña cu tin banda di Saliña Cerca. AT, prepara cu cara tapa, a logra pone man riba un di e sospechosonan. E otro a logra scapa. Autoridad di Noord a cuminsa cu un buskeda den vecindario pa mira si por a topa cu e otro sospechoso, pero envano. Den e auto a haya un tas. E tas aki tabata yena cu cierto cantidad di charger di telefon celular.
Manera cu ta conoci, tabata tin mas cu un atraco y den un di e atraconan cu a tuma luga diasabra, nan a logra bay cu mas of menos 20 pa 30 telefon celular. No sa sigur si den e caso aki e chargernan aki por tin di haber cu e prome atraco cu a tuma luga na Ponton, na Plug and Play, unda eynan tambe a confisca un brommer y tambe dos helm, cu a wordo uza pa e atracadornan.
Mientrastanto e departamento tecnico di BFTO a presenta na e sitio, a haci nan investigacion, tanto riba e tas cu a wordo haya den auto, tambe tabatin un mashin di pela den e auto y e auto a wordo confisca, hiba Shaba y e tas tambe, cu tur e materialnan di celular, a keda confisca, pendiente investigacion.
E sospechoso gara e momento ey, a wordo poni keto banda di e auto, te ora cu a presenta cu e dogcatcher pa transport’e pa warda, caminda cu e proceso di interogacion lo continua tambe. Atraco Team lo investiga si e persona aki ta envolvi den cualkier atraco y lo trata na saca afo tambe kende e otro persona cu a logra huy ta.
Tremendo trabao di Patruyanan uniforma, pero tambe un tremendo trabao di Arestatie Team diasabra anochi.
