Cu condicion cu e no mag traha: Dentista ilegal ta bek den libertad

Diabierna dia 6 di november pa 6:30pm, autoridadnan a haci un “inval” na Hubadastraat 11-D, un cas situa na Ponton. Ey a atende cu un dentista trahando ilegal, pues sin permiso di estadia, di trabou y pio di DVG cu ta permiti pa por practica medicina oral riba nos isla. Diamars dia 10 di november a prolonga su detencion cu un maximo di 8 dia mas, pero diabierna dia 13 di november a laga e sospechoso den libertad condicional.

Fiscal a tene na consideracion cu nan tin suficiente prueba pa persigui e dentista di nacionalidad Venezolano, trahando ilegal na Aruba y practicando medicina riba pashentnan sin tin permiso pa haci tal. Tambe a hay’e cu remedinan cu a drenta Aruba di forma ilegal. Mirando cu no ta necesario mas pa tin’e cera, a dicidi di lag;e bay diabierna atardi, cu condicion cu e no mag practica medicina oral mas cu ningun pashent! Asina cu tende cu e ta sigui atende pashent, lo ta motibo pa deten’e mesora bek.

A tene cuenta cu e mesun persona aki, ya tabata practica medicina oral na Aruba aña pasa caba. Inspeccion di Salud Publico (IVA) a bay cerca dje y a tah’e di wak pashent y practica na Aruba. A splic’e “na placa chikito” kico ta e rekisitonan cu e mester cumpli cu ne pa por bini na remarca pa por practica riba nos isla.

E problema den e caso aki no ta cu si e señora ta un dentista of no. Ni tampoco cu si e tin diploma of credencialnan pa por traha na Aruba. E reto ta cu e credencialnan no a yega na DVG pa por confirma cu e tin e cualidadnan ni tampoco a comproba cu e ta traha na e calidad cu ta rekeri na Aruba. Pa esey mester pasa dor di un screening y test prome cu DVG por duna conseho positivo pa Minister di Salud Publico traha un decreto ministerial den cual ta permiti e persona pa eherce e funcion.

Mayoria biaha ta haci esaki como excepcion pa motibo di scarsedad y ta pone un persona asina traha bou guia di un dokter cu si ta registra via e sistema Europeo conoci como BIG. Hospital y IMSan constantemente ta pidi gobierno pa haci excepcion pa nan por atrae specialistanan for di region pasobra ta dificil pa haya for di Europa. Den casonan asina, e dokter por bin traha pero ta raporta na un otro specialista. Den caso di dentista tambe sa haci excepcion pero na e momento aki NO tin scarsedad di dentista riba nos isla, pues dificilmente gobierno lo tin motibo pa haci un excepcion asina.

Pero si haci excepcion mes, e lo ta pa traha cu un clinica existente unda tin un dentista certifica via e sistema Europeo ta na cabes pa por garantisa un nivel halto di calidad di servicio. Pues ta casi imposibel cu Minister lo firma un “MB” pa un dentista traha den camber di un cas cu e ta huur, sin cu tin e medidanan di higiena na nan luga, sin tur herment necesario y sin tur remedi necesario pa yuda un pashent den caso cu algo bay robes of bon complicacion durante un tratamento of procedimento.

Ora di haci invalnan asina, Inspeccion di Salud Publico no ta tene cuenta cu si e persona ta casa cu un persona local of si e tin permiso di estadia of trabou. Nan control ta dirigi riba practica di medicina ilegal na Aruba, pa cual tur profesional mester di un permiso pa por haci tal. Aruba ta un pais organisa cu leynan y normanan halto di calidad den salud publico y tipo di practicanan asina den cas ta castigabel den nos leynan penal.