Scol ta bay habri den algun dia y pa di 8 aña 3 clubnan adulto di Kiwanis na Aruba: Kiwanis Club of Aruba
Kiwanis Club of Palm Beach y Kiwanis Club of Young Professionals ta preparando p’e. Nan tin 72 mucha cu nan ta yuda y e evento aki ta un di e proyectonan cu e club ta haci tur aña caminda e tres clubnan adulto ta bin hunto.
Segun Rothmar Coenraad, presidente di e comision cu ta encarga cu organisa e Back to School Event 2019 di Kiwanis, e aña aki a bin cu algo diferente den e proyecto. Pa varios aña nan ta haci Back to School, caminda muchanan di menos recurso ta haya backpack, uniform pa scol, etc.
E aña aki a trece un cambio caminda cu a bin Stay In School Program. Fuera di e materialnan pa cuminsa cu scol bon, ta bay guia of sponsor 10 mucha durante henter e aña, den tres categoria diferente, cual ta deporte, arte y musica.
Aki ta identifica via di e scolnan obviamente, e muchanan cu tin e talento den e areanan aki, caminda cu ta bay yuda nan. Por ehempel un mucha cu ta hunga futbol cu su keds di bala y demas materialnan pa hunga futbol. Ta algo nobo cu Kiwanis kier trece pa duna un balor agrega na e proyecto Back to School.
Muchanan ta ansioso
Segun Coenraad, esaki ta e meta di Kiwanis. Lema ta Kids Need Kiwanis. Ta mira e muchanan entusiasma. For di 7’or di mainta nan ta para na diferente punto caminda cu ta pasa cu bus y pick nan up. E entusiasmo ta yena e mas cu 30 miembro di Kiwanis cu ta presente pa yuda, cu satisfaccion. Tur ta haci’e pa e meta aki, cu ta e muchanan. Cada mucha cu yuda, ta yuda Kiwanis yega na nan meta. E meta internacional ta, yuda un mucha den un comunidad y den e caso aki tin 72.
E muchanan cu ta traha cun’e pa varios aña, ta di 1ste te cu 6de klas. Sinembargo tin e muchanan cu net a gradua bay scol secundario y awe tin cinco mucha cu ta bay scol secundario cu tambe ta den e grupo di 72. Pero e focus ta muchanan di 1ste te cu 6de klas.
Con ta yega na e muchanan
Pa scoge e muchanan, ta haci’e hunto cu scol. Kiwanis tin bon contacto cu scolnan rond di Aruba. Via di scolnan ta haya e nombernan y asina ta traha hunto cu scol. Hunto tin cu haci’e pa yega na e nomber di e muchanan cu mas mester cada aña.
Gracidimento
E aña aki a haya ayudo di Yrausquins & sons, cu a yuda sponsor cinco mucha. Manera cu a acerca nan, nan tabata habri pa yuda. Tambe nan a yuda produci un video.
Oduber & Kan cu e aña aki a trece un dinamismo den e proyecto, caminda cu nan a haci un vision screening pa tur mucha. E vision screening no ta solamente un screening awo, sino a saca un grupo di mucha cu tin mester di bril, cual nan tambe ta sponsor. Sigur un danki grandi ta bay pa nan di parti di Kiwanis.
Asina por sigui menciona e diferente stakeholdernan cu a sa di yuda den e proyecto aki. Sin nan e proyecto aki no por continua.
