cu asombro atia a tuma nota cu entrante 1 di augustus gobierno ta anuncia, pa medio di prensa, cu salario ta subi cu 2%. representantenan di comercio manera atia, cu ta representa e gremio comercial cu lo mester paga e aumento aki, ni ta wordu scucha of informa officialmente di e aumento retroactivo.
gobierno atrobe ta hasi e costo di hasi negoshi na aruba aumenta sin duna cuenta di e cifranan i instancianan cu normalmente ta wordu pidi pa conseho ora ta trata di ajuste di salario. indicadornan manera inflacion, precion ariba mercado laboral, consecuencia economico pa negoshi, ta parse no ta indicadornan cu ta wordu teni cuenta cune mas. e manera di introduccion aki ta carece di tur transparencia comercio lo mester bai inverti tempo di personal i ajuste den programa pa adapta e cambio di salario aki na mitar di un anja fiscal i paga e cuenta cu ta wordu impone ariba comercio di aruba atia ta protesta energicamente contra e “modus operandus” aki.
no por ta asina cu den nos un democracia no tin luga mas pa dialogo i cu den corant comercio tin cu tuma nota di cambionan cu ta afecta nan, i cu netamente nan mester paga. e manera di a tuma e decision aki no por carga approbacion di atia. atia semper ta dispuesto pa dialoga ariba posicionnan cu ta na beneficio di un comunidad, nos economia i comercio, pero no por approba cu decisionnan cu netamente commercio lo carga su gasto, ta wordu introduci na e manera cu esaki ta tuma luga. den e dianan nos dilanti atia lo bai scucha su miembrecia i tur otro gremionan comercial pa fiha un posicion uni.
