Desde awe Cruz Cora internacional a saca un peticion pa tur nan miembronan rond mundo pa saca un man di yudansa pa Bahamas. E isla a sobrebibi horcan Dorian e siman aki, cu a pasa den categoria 5 cu biento di velocidad di 185 miya pa ora. A conta 5 morto caba mientras cu tin miles di casnan destrosa, di cual un cantidad di ciudadano a keda riba caya. Cruz Cora Aruba ta cla pa yuda y ta colectando placa awor pa manda Cruz Cora na Bahamas.
Stephen Daal, Presidente di Cruz Cora Aruba, a start e campaña cu un bon noticia cu Gobierno di Hulanda a aporta na 300 mil florin caba na Cruz Cora Aruba, cu e peticion pa manda e placa ey pa Bahamas. Awor kier mira cuanto sector priva di Aruba y pueblo en general por yuda cune. Tur tiki ta yuda.
E placa ta bay pa Cruz Cora pa yuda 25 mil famia na Bahamas pa 1 aña largo. Pues e fondonan ta bay pa ayudo humano, pues no pa infrastructura ni nada di luho. Por transferi e placa of deposita riba e cuenta menciona aki bou na Aruba Bank.