Si nos kier cuminsa tuma na serio e palabranan Integridad y transparencia, anto e ora a yega pa pone tur 52 carta riba mesa. Esaki ta nifica cu tur documento, estudio haci pa departamentonan, contractnan cu pais Aruba ta cera pa cualke proyecto ta bira publico, Cristian Soto Garcia ta splica.
“Desconoce un berdad ta haci bo esclavo di mentira.” Esaki ta un dicho Hapones cu algun aña atras a bira hopi popular riba rednan social door di e orador di origen Hapones Colombiano, Yokoi Kenji. Awe den 2021, e dicho aki ta un refleho di nos situacion y lastimamente e berdad tambe di gobernacion di nos pais.
Transparencia y integridad ta dos palabra cu nos a bin ta scucha hopi y por hasta bisa cu esaki ta hancra mas o menos den nos leynan. E mas of menos ta pa motibo cu aunke esaki ta ser regla den un ley (Landsverordening Openbaarheid van Bestuur, of LOB), e ta keda na un minister si e haya su gana di duna e informacion cu ta ser pidi na dje for di un ciudadano. Mas leu ainda, e minister por uza diferente maniobranan den e ley aki pa rek un peticion, hopi biaha forsando un persona pa bay corte, malgastando placa di pueblo na abogado, pa finalmente duna e informacion pidi parcialmente.
52 carta riba mesa
Kico nifica pone tur 52 carta riba mesa? Pone tur 52 carta riba mesa ta nifica cu tur documento, estudio haci pa departamentonan, contractnan cu pais Aruba ta cera pa cualke proyecto, ta bira publico, sin cu partidonan tin cu resorta na haci uzo di LOB.
Pues no ta papia di solamente cifra pero berdad sunu di loke ta biba den pueblo, manera entre otro cifra di pobresa, abusonan etc. Cifranan di eficiencia di departamentonan gubernamental tambe ta cay bou di esaki. E concepto aki ta conoci como ‘open data’, unda no tin restriccion pa yega na e informacionnan menciona. No por ta asina cu pueblo mester simplemente kere den palabranan cria via un cuchara di un politico, sin tin acceso na e informacion pa pueblo por comproba pa su mes loke ta ser bisa. Y no por ta asina tampoco cu solamente esunnan cu sa di LOB y con pa aplica p’e, manera huristanan, periodistanan y otro partidonan interesa, por haya acceso na (parti di) e informacion aki.
Pa por yega na unda semper lo bay pone tur 52 carta riba mesa ta bay ta un proceso doloroso, pero necesario. Scucha y wak e berdad cu nos ta biba aden no ta facil, pero poniendo tur informacion riba mesa lo crea un pueblo critico. Un pueblo cu por tuma decision abase di conocemento y finalmente por duna balor real na dicho popular ‘awo si bo por wak unda bo placa ta bay’.
‘Nos no tabata sa’
Mientras cu durante campaña semper tin tur tipo di solucion, ora cu un gobierno nobo sinta ta ser bisa ‘nos no tabata sa di e situacion aki’. Pa e motibo aki, prome cu bin cu proyectonan irealistico, of bolbe den e mesun ciclo vicioso di fixmento aki aya, e enfoke principal pa e siguiente parlamento mester ta pa den e prome aña trece adaptacion na e Landsverorderning Openbaarheid van Bestuur, crea un ley di archivo y hacie un mandato pa e gobierno cu sinta pa publica tur dato existente di tur departamento. E publicacionnan aki claro mester ta di tal indole cu e no ta afecta informacionnan personal y/of confidencial di ningun persona.
E hoben empresario Cristian Soto Garcia, miho conoci como Soto ta termina bisando pa considera den haci esaki posibel tambe como un di su compromisonan como politico nobo. “Nos no por keda mas ta haci e mesun cos y spera un resultado diferente. Cambio ta necesario y ningun cambio ta bin sin Accion!”
