DVG a ratifica maneho di entiero: No ta haci excepcion!

Crisis Team ta informa tocante e protocol nacional di entiero den temporada di COVID. E protocol nacional ta basa riba puntonan di salida di World Health Organization y RIVM, teniendo cuenta cu e situacion y tradicionnan di Aruba, y cu presencia di varios variante di COVID actualmente na Aruba. Esey ta pone cu e maneho na Aruba mester ta mas cauteloso cu por ehempel Corsou of Boneiro, pa proteccion di nos cuidadanonan.

Despues cu a ricibi informenan di inconsistencia den ehecucion di e maneho entre agencianan funeraria na Aruba, Crisis Team a reuni siman pasa cu e agencianan funeraria di Aruba, Aurora Funeral Home, Ad Patres y Olive Tree, y a confirma e protocol y reglanan aplicabel na tur entiero den temporada di COVID. Tambe e reglanan adicional aplicabel den caso cu un persona cu fayece tabata tin COVID na momento cu el a fayece. Siguientemente e reglanan aki a wordo ratifica den crisis team y pues ta reglanan estableci cu tur funeraria mester tene nan mes na dje.

REGLANAN APLICABLE PA TUR ENTIERO

1.       Mester usa tapaboca na tur momento

2.       No por hiba e fayecido cas pa tuma despedida

3.       No por duna man, brasa, of sunchi

4.       Maximo 25 persona por ta den e mesun luga na mes momento, y mester tene distancia di por lo menos 1,5 meter

5.       Cuminda of bebida no ta permiti

6.       Si bo ta sinti malo, no atende un entiero

7.       Miembronan di famia cu ta den isolacion of cuarentena, no por acudi na e entiero; pa mayornan, yiunan y rumannan cu ta den isolacion of cuarentena, por regla un otro momento pa despedi a traves di e funeraria na autoridadnan competente

E reglanan aki ta vigentedesde18september 2020, y ta publica desde e fecha eyriba website di DVG. E reglanan aki ta aplicabel den tur entiero durante temporada di COVID, tanto si e persona a fayece cu COVID, conoci e persona no a fayece cu COVID.

REGLA ADICIONAL PA TUR ENTIERO DEN CASO DI COVID

Den caso cu e persona cu fayece tabata tin COVID na momento cu el a fayece, tin reglanan adicional. No ta haci diferencia si e persona a fayece di COVID of di algo otro, por ehempel un accidente di auto of problema di salud, den caso cu e persona cu fayece tin COVID na cu el, mester aplica mas precaucion. E regla adicional ta

8.       No por habri caha durante entiero.

En bista cu na Aruba tin actualmente varios variante di e COVID virus presente, y en bista cu nos no conoce tur aspecto di e variantenan ainda, Crisis Team ta aplica extra cautela pa asina protege ciudadanonan di pais Aruba, y pa preveni contagio mas tanto posibel.

Tur agencia funeraria a aproba e procedura aki, y Team di Maneho di Crisis Team a establece e maneho aki den cuadro di COVID. Crisis Team lo sigui evalua e desaroyo y e maneho riba base regular y lo anuncia na momento cu tin cambio.