Nos ta den e temporada di fin di aña. Ta un custumber y tradicion cu nos pueblo di Aruba mester tin un plato crioyo cu ta tipifica e diferente platonan Arubiano riba mesa. Un sopi of stoba di Cabrito of Carne no por falta riba mesa. Pa e motibo aki, cu Santa Rosa semper ta stimula tur criado di bestia local, pa nan percura pa nan bestianan semper ta bon cuida pa asina no tin problema na momento di keur na Abbatoir.
Manera semper den e temporada di fin di aña hopi ta esunnan cu ta busca pa cumpra carni of pisca. Pa e motibo cu esaki ta e temporada caminda cu carni fresco ta mas pidi, Departamento di Agricultura, Cria y Pesca ta conscientisa no solamente e criado pa sigura cu nan producto ta di calidad pero tambe ta importante pa e consumidornan tene bon na cuenta e rekisitonan di control cu mester tene cuenta cu ne.
E demanda grandi cu e carni bestia chikito tin den e temporada aki ta haci cu por tin esunnan cu lo opta pa sacrifica na nan cunucu sin tin e control debido di parti di DVG cual ta prohibi. Departamento di Agricultura, Cria y Pesca ta haci un apelacion na tur criado di bestia, pa sigura cu nan haci nan cita na tempo via Abbatoir y pa na momento di bende nan producto, pa nan por tin muestra di goedkeuring duna na Abbatoir.
E maneho di DVG ta stipula cu tur criado di bestia, sea cabrito of carne y/of porco y te hasta baca, mester ta gekeur prome cu bende esaki pa consumo.
Tur bestia pa consumo mester ta sacrifica y controla p’e profesionalnan di Abattoir. E keurmeesternan ta controla tur organo di e bestia prome cu e haya su stempel oficial di Gobierno. Na momento cu e keurmeesternan di Abattoir tuma nota cu algo no ta bon e cu bestia, ta confisca y ta deshaci di esaki. Tur criado di bestia mester yama servicio di Veterinario, Abattoir na telefon 522-4310 pa traha un cita delanta y alabes registra cuanto bestia lo mester sacrifica pa asina tur cos bay di acuerdo cu regla. Corda cu tin regla y protocol di COVID-19 stipula cu cada criado mester tene na cuenta.
E siguiente apelacion ta bay na tur consumidor na momento di busca carni di bestia local pa cumpra. Na momento di cumpra carni, semper opta pa cumpra cerca e criadonan cu abo sa cu su bestianan ta mata na Abattoir y cu por mustra nan carchi di goedkeuring. Tuma nota tambe na momento di cumpra parti di e bestia, pa haci un control pa verifica si bo ta mira cu e carni fresco na e momento ey tin e stempel di gobierno ariba dje. Esey ta nifica cu e ta gekeur pa e keurmeesternan di abattoir. No lubida cu matamento di bestia na cas of cualkier otro caminda cu no ta na Abattoir ta contra ley e tin sancion pa esaki.
‘Sostene nos Sector Primario, door di cumpra local’.
