COVID-19 na Aruba: E victima fatal di mas hoben tabatin 36 aña

Desde maart di aña 2020 te cu awe por señala cu un total di 7438 persona a keda registra positivo cu COVID-19 na Aruba. Di e 7438 personanan aki, 7062 tawata residente di cual 68 a fayece como consecuencia di COVID-19. Edad di esunnan cu a test positivo ta varia, pero e grupo mas afecta ta e grupo di edad 25 pa 54 un grupo di edad hopi activo den nos comunidad.

E total di 7062 residentenan positivo, ta representa un averahe di 6% di nos poblacion segun e ultimo cifranan di Centraal Bureau Statistiek Aruba.  

Di e 7062 residentenan positivo, un total di 68 a fayece, cu ta representa casi 1% di esunnan positivo. Entre esunnan cu a fayece, e edad average ta 74 aña, caminda e mas hoben cu a fayece di COVID-19 tawatin 36 aña y esun di mas edad tawatin 94 aña.

E grupo di edad unda mas persona a fayece ta 75 aña y mas grandi. Den e categoria aki, 38 persona a fayece, di cual ‘cardio vascular disease’, obesidad, presion halto y problema di riñon ta algun di e enfermedadnan cu e personanan aki tawata sufri di dje.

Conclusion:
Si tuma nota cu solamente un averahe di 6% di nos poblacion a test positivo pa medio di un PCR test y tambe teniendo na cuenta, segun estadisticanan, un total di 50% di esunnan cu bin den contacto cu e virus di COVID-19, ta desaroya sintoma. Esaki nifica cu ainda un cantidad grandi di nos comunidad ta vulnerabel pa e virus. Vulnerabel pa desaroya sintoma, complicacion y hasta fayece pa motibo di COVID-19.

Esaki ta e motibo pakico e vacuna contra COVID-19 ta di gran importancia pa nos poblacion. E cantidad di personanan cu ta proteha contra COVID actualmente ta relativamente abou compara cu esunnan cu ainda ta na peliger di haya COVID, bira hopi malo y te hasta fayece. Solamente pa medio di e vacuna lo por brinda proteccion contra e virus. E vacuna lo proteha bo di haya un infeccion cu COVID, evita cu bo por haya sintomanan grave cu por tin consecuencia fatal of di sigui plama e virus.