Awe mainta Corte a dicta sentencia den e caso penal contra Risheila Frans, mama di e dos criaturanan cu a fayece a consecuencia di maltrato severo na man di Gabriel Martin. Hues a baha e castigo pidi pa Fiscal y a dicta tres aña di castigo pa Risheila Frans di cual un aña ta condicional. E lo sinta un aña so mas di castigo den prizon.
A haye culpabel como parcialmente complice di e asesinato. E tabata na altura di loke ta pasando y por a haci algo pa evita, segun Hues a splica. E acusado mester haya guia di reclasering. Hues a impone un tempo di prueba di 3 aña, den cual e mama mester haya guia di reclasering. Den e periodo ey por encera tambe prohibicion di tin contacto cu su yiunan y cu asesino di su yiunan, esta su ex pareha Gabriel Martin.
Tabata dia 24 di augustus ultimo cu a trata e caso penal contra Risheila Frans, mama di e dos rumannan Eugene y Rishandroh, kendenan a perde nan bida door di maltrato pisa causa pa nan padrastro. Ministerio Publico a mantene su mesun posicion cu e tabatin dia 15 di juni.
Anteriormente a habri e caso aki bek pa laga un otro psikiatra evalua e acusado aki pa motibo cu e rapport di e momento ey di psikiatra y psicologo ta contradeci otro. E rapport cu a wordo traha awo door di un psikiatra no a duna contesta specifico pero pa Ministerio Publico e rapport ta confirma loke tin para den e procesverbaal di e caso aki: Risheila no ta sufri di un enfermedad mental cu por considera cu e ta menos responsabel pa su actonan.
Ta berdad cu e tin e sindrome di muhe maltrata, ta sufri di depresion pero Fiscal no ta kere cu e ta un persona cu no por defende su mes.
Pues Ministerio Publico no ta mira motibo pa desvia di su demanda anterior di 4 aña di cual 1 aña condicional pero pa “medeplichtigheid”, di tabata sa di loke a pasa cu su yiunan y no a bati alarma of a haci denuncia. Manera e ultimo acusacion contra dje ta bisa: Ta acusa e mama di a laga e dos menornan varios biaha y intencionalmente den un estado desampara (mientras e tabata sa cu nan tabata wordo maltrata gravemente y cu frecuencia pa e padrastro y cu nan no por a defende nan mes) dor di keda sin actua na ora y/of dor di keda sin hiba nan na un luga sigur na ora y/of dor di keda sin proteha nan y/of dor di keda sin duna nan ayudo medico y cuido medico adecua, loke tabatin lesion grave y nan morto como consecuencia.
Fiscal a splica cu pa “medeplichtigheid” (cu e mes no a comete e acto) ley ta permiti’e pidi un tercera parti di loke e acusado principal a haya, esta 5 aña. Pero a tene cuenta cu e tambe a wordo maltrata pa un periodo largo y e ta sufri di depresion.
Pues, Ministerio Publico a demanda 4 aña di prizon, di cual 1 aña ta condicional. Hues awe a baha e castigo na 3 aña di prizon di cual 1 ta condicional. Di esey ta resta mas o menos 1 aña so mas di castigo di prizon pa mama di dos criatura victima di maltrato domestico pisa.
