Tabata dia 26 di maart 2013, cu tres Hues di Corte Comun di Caribe Hulandes, esta mr. J. de Boer, mr. J. de Haan y mr. J. Drop a ratifica e sentencia di e prome Hues den e caso civil cu Rocco Tjon a entama contra mama di su yiu, esta S.P., relaciona cu custodia di su yiu muhe. El a perde den e prome caso y despues a bolbe perde den apelacion. Na tur 8 Hues y 1 Fiscal tabata cerca di e mesun caso aki y tur ta mir’e mesun cos…..cu Rocco Tjon no ta apto pa mira su yiu muhe, debi na acusacion serio contra dje di a mishi cu su mesun yiu!

Ta menciona 8 Hues, pasobra ta varios Magistrado a atende cu e mesun caso aki, den cual Tjon a purba di tur forma pa por haya custodia comparti di su yiu chikito, pero ni kico el a haci, tur e Huesnan tabata di acuerdo cu e mucha y cu e mama, cu e mucha no ta sigur na man di Tjon debi na sospechoso serio di pedofilia. Es mas, e prome Hues a dicta un sentencia na fabor di e mucha y e mama dia 13 di april 2010, despues a busca un “tussenbeschikking” dia 5 di october 2010 y atrobe dia 31 di mei 2011 y sin lubida un “eindbeschikking” dia 1 di november 2011.

Comosifuera poco, Tjon a apela tur e sentencianan aki y a bay Corte Superior cu dia 26 di maart 2013 a ratifica e sentencianan anterior y a confirma e miedo di e yiu muhe di laga su tata yega cerca di dje. Pa colmo, e abogado di e mama den e ultimo caso aki tabata ex Hues, mr. Theresa Croes-Fernandes, pa cual nos ta bisa cu ta 8 Hues a repasa e mesun caso aki. Y riba dje, ex Fiscal di Ministerio Publico, mr. Amalin Flanegin, tambe a acesora e mama di e mucha, di inicial S.P., durante e prome casonan.

For di november 2011 Rocco Tjon a apela e sentencia di Corte den Prome Instancia. Na februari 2013 a trata e caso di apelacion, den presencia di abogadonan. Tjon a pidi pa e haya custodia comparti di su yiu, hunto cu e mama. Tambe pa e mama inform’e di tur desaroyo cu tin di haber cu e mucha, kende ta naci na aña 2007, pues cu tin 12 aña di edad awendia.

Sinembargo, e tres Huesnan den nan sentencia a indica cu: Op basis van de stukken en de waarneming van het Hof ter zitting in hoger beroep kan niet anders worden geconcludeerd dan dat de weerstand en het wantrouwen van de moeder, bij wie het kind verblijft, te sterk zijn om verantwoord een gezamenlijk gezag en een omgangsregeling vast te stellen. Het Hof ziet geen mogelijkheden deze weerstand en dit wantrouwen te doorbreken.

Na defensa di Rocco Tjon, abogado mr. Nancy Gravenstijn a purba convence Corte di Apelacion cu na Europa nan a condiciona e periodo cu un tata ta keda sin mira su yiu, na un termino mas cortico. Pesey a pidi e tres Huesnan pa laga e periodo ey yega te awor, esta ora cu e mucha cumpli 12 aña di edad. Sinembargo, mirando e acusacionnan cu tin, e angustia di e criatura ki ora e tende di of mira su tata, cu Huesnan no a acepta e peticion di Tjon y a laga e sentencia di Corte di Prome Instancia mesun cos. Pues cu ta mira e mucha te ora cu e tin edad den cual e mes por dicidi cu si e kier atende cu su tata of no. Locual si Huesnan a bay di acuerdo ta, pa e mama mantene e tata informa di asuntonan importante den bida di e yiu muhe.

Pa resumi, aclaria y pa mantene e asunto aki den perspectiva:

E yiu muhe di Rocco Tjon a conta e mama, psikiater di mucha, Polis y na otronan, cu su tata a mishi cune duro na su parti priva ora e ta cerca dje y cu e tin masha miedo di atende cu su tata. Scol a confirma cambio den actitud di e mucha asina cu e mira su tata. Sin kier bay den mas detaye di kico tur mas e mucha a conta di e actual Lider di Fraccion di MEP, e mama a keh’e na Polis. Pero….e tempo ey Inspector Tjon mes tabata hefe di JZP y e mama tabata traha na Ministerio Publico. E Procurador General a tuma e asunto como un “problema di pareha” den cual lo kier uza husticia como e “referee”. A manda e caso pa JZP di Corsou investiga y asina mes a haya cu no tin caso of no tin evidencia suficiente pa un caso penal.

E mama no a keda contento cu e decision di PG y a apela e decision aki na Corte Comun di Caribe Hulandes na Corsou cu a revisa henter e keho y a dicidi na final cu PG tin rason pa no investiga e caso. Consecuentemente e mama a opta pa cana e caminda civil y a convence Hues eynan cu aunke no a investiga Rocco Tjon pa Pedofiel, cu e no kier pa e yiu mir’e nunca, pasobra e mucha ta sufri. E Hues a bay di acuerdo cu e demanda y a dicta su sentencia na fabor di e yiu muhe y na e mama. Ta e caso aki Tjon a apela na Corte di Apelacion na Cosou y a perde tambe.

Cu tur e casonan y e sentencianan aki riba mesa, ainda Tjon no kier pa contrincantenan politico cord’e di e casonan di Pedofiel den su contra y di e sentencianan di Cortenan Civil y di Apelacion den su contra cu nan base, aunke no ta penal pero si ta prohibi’e di mira su yiu muhe pa e mesun motibo dicon a keh’e penalmente. Pues locual e Hues penal no a mira, esunnan civil si a mira y a bay di acuerdo cu nan. No un Hues, no dos, sino 8 diferente Hues ta pensa mesun cos y un ex Fiscal di Ministerio Publico.

Awor Rocco Tjon, cu kier mira un futuro den politica, ainda lo mester pasa dor di e Corte Publico, cu ta uza otro metodonan pa investiga, opina y condena acusadonan den tipo di casonan asina!

Comments

comments