E siman aki a habri cu e organisacion Aruba Birdlife Conservation (ABC) a tuma nota di rosamento di tereno tras di The Mill Resort. Segun e organisacion, cu den e proceso a kibra neishi di shoco y otro bestianan cu ta biba den e area, cerca di Bubaliplas (wetlands). A dicidi pa mesora entama un caso sumario contra e hotel y contra Gobierno, di cual awe Hues a bay di acuerdo cu nan demanda pa un medida di ordo, pendiente tratamento di e caso sumario mes.
Abogado di e organisacion, mr. Geert Rep, cu su oficina situa na J.E. Irausquin Boulevard # 22, a entama e caso awe dia 6 di maart 2018 na Corte di Prome Instancia di nos pais. E caso ta contra Gobierno di Aruba y contra Mill Resorts N.V., situa na J.E. Irausquin Boulevard # 330.
Di acuerdo cu e peticion pa e caso sumario, ABC ta pidi Hues pa obliga Gobierno, pa mesora entrante mañan 7 di maart 2018 caba, pa nan para e trabounan di construccion andando den e area considera (segun ABC) como tereno protehi. Gobierno lo mester haci esaki via baricadanan, heki, cura, etc., pa evita cu tractor, bulldozer, etc., por sigui cu nan actividadnan di construccion. Ta pidi Hues pa prohibi The Mill Resort pa sigui cu nan actividadnan di construccion den e areanan menciona. Y na di tres luga, pa Hues prohibi Gobierno pa entrega e tereno “erfpacht” na The Mill.
Peticion pa caso sumario ABC vs Gobierno
Interesante ta, segun abogado, cu e tereno specifico ey ta registra bou di The Mill Resorts, aunke nan nunca a haci uzo di dje, aunke nan tin e tereno desde aña 1989 caba. Den e akte di 29 aña pasa ta stipula cu e tereno lo caduca despues di 2 aña cu no haci uzo di dje. Di otro banda, e compania mes Mill Resorts NV bou kende e tereno ta otorga, no ta existi mas na Camara di Comercio.
ABC como tal ta puntra su mes si ta nan mes ta haciendo e trabounan aki di ampliacion of por ta un otro compania cu lo kier haci algo eytras. ABC ta duda masha cu esaki tin di haber cu The Mill, aunke cu e hotel entretanto a pasa pa mannan Venezolano y prome cu fin di e aña aki lo “rebrand” pa Aruba Marriott Courtyard.
Decision di Corte – Ordemaatregel
Hues mr. Sap despues di un evaluacion cortico, a dicidi mesora riba e peticion pa emiti un “orde maatregel” y a bay di acuerdo cu e demanda di ABC y a pone un “dwangsom” di 250 mil florin pa dia of parti di cada dia cu no cumpli cu e ordo aki, te na un maximo di 5 miyon florin.
Aunke e fecha pa tratamento di e caso sumario no ta definitivo, te awor tentativamente e lo tuma luga dia 23 di maart 2018 pa 9:30am.
