Na inicio di e aña aki Corte a trata un caso masha peculiar di cual finalmente tabatin un decision cu no tabata manera e demandante (homber) a spera.
Ta trata di e caso di un homber, kende a casa cu un señora Latino y el a sali engaña pasobra ningun di e datonan di e muhe ta cuadra ni e edad cu el a bisa cu e tin.
E homber Arubiano aki a drenta enlace matrimonial dia 14 di december, 2005 cu un señora di nacionalidad Venezolano. E dama Venezolano aki ta inscribi den registro civil di Aruba for di 24 di juni, 2005 te cu awe ainda. El a entrega tur su documentonan, apostilla. Di e matrimonio aki a nace un yiu, kende ta menor di edad. El a haci uzo di su supuesto identidad Venezolano tanto ora di su matrimonio y ora di inscripcion nacemento di su yiu homber.
Dia 28 di april, 2019, e señora a biaha pa Colombia y na su yegada autoridadnan a detene pa posesion di di paspoort falso. Mesora el a admiti esey y a declara cu e tin nacionalidad Colombiano y a duna su berdadero nomber.
Funcionarionan di Registro Civil di Aruba a drenta den contacto cu autoridadnan Colombiano pa haya e datonan real di e señora aki. Asina dia 17 di januari, 2020 a logra haya su datonan real, esta cu el a nace na San Marcos, na aña 66 y di nacionalidad Colombiano.
E homber Arubiano a pidi Corte pa anula e matrimonio aki pa motibo cu el a wordo engaña door di e muhe. El a kere cu el a casa cu un muhe Venezolano naci na 1971 (pues cinco aña mas hoben y el a resulta 5 aña mas bieu).
Ley ta permiti e homber, den e caso aki, pidi anulacion di e matrimonio, door cu e muhe a gañe cu datonan falso. E unico manera cu no por anula e matrimonio den un caso asina, si e homber a sigui biba cu e muhe durante 6 luna, despues cu el a haya sa di e situacion di identidad falso. Y sin cu el a haci e peticion pa anulacion.
Segun Corte, e homber a demostra cu apenas dia 28 di april, 2019 el a haya sa e identidad real di e muhe pa cual su peticion na Corte ta entrega na tempo y Corte por trata e caso.
Tambe Hues ta bisa cu na momento di e matrimonio, e muhe a haci uzo di un identidad falso, y otro datonan falso. Pa husga validez di e matrimonio, Hues ta haya e aspecto irelevante. Ta bay pa e persona cu kende e homber a casa y no pa e nomber, fecha of luga di nacemento. Ta un hecho cu no ta trata cu el a casa cu un hende robes. A base di esey, Hues y Corte ta dicidi cu e matrimonio ta valido.
E procedura cu e Arubiano mester sigui awo ta pa e divorcia.
