Corte: Monumentenfonds NO mester paga BBO

Un caso civil cu a cuminsa na aña 2015 caba ora cu Inspector di Impuesto a dicidi di cobra Fondo di Monumento impuesto BBO a finalisa e luna aki den Corte Comun di Caribe Hulandes cu un decision cu a cay na fabor di Fondo di Monumento. Departamento di Impuesto (DIMP) a cobra nan pa motibo cu tin entrada y tin un fondo di reserva pa cual a consider’e un negoshi y cu e excepcion pidi pa motibo cu ta dedica na cultura, toch no a cambia opinion di DIMP cu a cobra nan toch!

E organisacion aki tin como meta renoba y mantene monumentonan na Aruba. Segun e cuentanan anual di aña 2013 e actividadnan di e Fondo aki tabata principalmente compra, restauracion y maneho di monumentonan na Aruba, como tambe financia pa restauracion, mantencion di edificionan (monumentonan), brinda servicio riba tereno financiero y administrativo, como tambe busca, maneha y pone disponibel recursonan pa destaho pa cual renobacion y mantencion di monumentonan na Aruba.

Den discusion ta si por considera Fondo di Monumento un “ondernemer” manera describi den ley di BBO. E otro pregunta tabata si esey ta e caso, e lo ta un di e institutonan cu por bini na remarca pa exoneracion di pago di BBO door cu ta consider’e un institucion cultural. Si e haya exoneracion, e siguiente pregunta ta con grandi e suma di exoneracion ta.

Despues di haci un analisis profundo riba tur e preguntanan, Corte di Apelacion a yega na e siguiente conclusion. Por considera Fondo di Monumento como un “ondernemer” manera describi den e ley di BBO, pa motibo di e forma con su actividadnan ta wordo desplega y e forma con e tin su entradanan. Pero di otro banda, por consider’e un institucion cultural cu ta bini na remarca pa exoneracion. Ta papia di un suma maximo di 250 mil florin cu por exonera. E pregunta e ora ta si ta papia di e suma di exoneracion aki ta mensualmente of pa aña. Despues di analisa e ley, loke e Minister encarga a yega di bisa den Parlamento, Hof ta conclui cu e suma aki ta mensualmente pasobra BBO no ta wordo paga pa aña pero mensualmente.