Den media ultimo dianan a publica cu varios Venezolano, cu tabata cera pendiente nan deportacion, a sali liber riba decision di Hues Comisario na Corte di Prome Instancia. E publicacion aki no ta cuadra cu berdad!
E realidad ta cu e mesun Ministerio di Husticia a manda informa den fin di siman cu Minister mester a adapta su maneho y a reuni cu tur departamento despues cu a bira conoci e decision di Hues Comisario. Esey sin duda a causa un consternacion den comunidad y a causa reaccionnan hopi emocional contra Huesnan.
Den un comunicado oficial di Corte Comun di Caribe Hulandes awe, a subraya cu den casonan di detencion di stranheronan cu e meta pa deporta nan for di nos isla, e Hues Comisario tin e autoridad pa verifica si e detencion tabata legal y si e ilegal mester wordo deporta.
Den e caso specifico aki di e Venezolanonan, durante interogacion na Hues Comisario, nan a laga sa cu nan kier asilo politico. Esey no ta un peticion cu por haci na Hues Comisario, sino na Gobierno. Tratado di refugiadonan ta indica cu no por deporta un stranhero si no a tuma un decision ainda riba su peticion pa asilo. Hues y Hues Comisario mester atene nan mes na e reglanan aki den e tratado, mescos cu otro leynan adopta dor di Gobierno di Aruba.
Hues Comisario a dicidi cu e detencion cu e intencion pa deporta e ilegalnan aki, ta corecto. Pero, si acaso e stranheronan haci un peticion na Gobieron pa asilo, e ora no por bay over na deportacion. Si e stranheronan a pidi asilo of no, e Hues no tabata sa na e momento ey. Ta si acaso nan lo a haci dicho peticion, cu e ora ey Gobierono no lo tabatin e autoridad mas pa deporta e grupo aki sin contesta nan riba nan peticion. Tampoco no por mantene e stranheronan deteni mientras cu ta sperando un contesta riba asilo, di acuerdo cu e tratado di refugiadonan.
Pues, Corte Comun di Caribe Hulandes ta subraya, cu e Hues Comisario no a dicidi cu Gobierno tabata obliga pa laga e stranheronan den libertad. E Magistrado solamente a dicidi cu lo no por wanta e stranheronan deteni cu e intencion di deporta nan for di Aruba, si nan lo a haci un peticion oficial pa asilo na Gobierno.
