Corte: Minister Besaril ta exigi pa Jan Poets rectifica cu e no ta pedofiel

Esaki ta di dos caso cu Minister Plenipotenciario Guilfred Besaril ta entama pa por garantisa cu e ta mantene su bon nomber. Algun siman pasa, net riba dia di e manifestacion contra pedofiel, e conocido presentado di television y autor di e rubrica “Den Ambiente” den e corant Diario a pone riba su pagina di Facebook cu Minister Besaril ta un pedofiel. El a hasta bisa di tin prueba tambe di e acusacion serio contra e mandatario y alabes ex-Polis. Un rato despues el a baha e publicacion.

E acusacion tabata dia 3 di juli den forma di un video. Ey Jan Poets a papia di un “vrijspraak” cu Minister Besaril a haya den un supuesto caso di pedofilia pero cu e realidad tabata diferente. E mesun dialuna, dia 6 di juli el a baha e video y a emiti un disculpa publico.

Pero, no ta esey ta locual e mandatario tabata kier. El a demanda e presentado di noticianan farandulero cu e mester rectifica y bisa specificamente cu el a comete un eror y cu sin ningun prueba a acusa e Minister pa pedofiel. Djis di kita e video cu e acusacion no ta suficiente pa e mandatario.

Awe abogado mr. Chris Lejuez a defende interes di Minister Guilfred Besaril den Corte. Ey a subraya cu mester rectifica manera cu e Minister a pidi, pasobra e no por permiti pa Jan Poets, djis pasobra e tin gana, ta bira yam’e pa pedofiel asina sin mas, sin cu e tin prueba pa haci tal. A splica Hues cu otro aña tin eleccion na Aruba y tipo di “fama” asina por stroba e politico den voto y ta susha su bon nomber inecesariamente.

Hues a scucha defensa di Jan Poets den e caso aki y esun di abogado mr. Chris Lejuez y a bisa di lo pensa dos siman riba su decision. Riba dia 19 di augustus e lo dicta sentencia.