Tabata dia 13 di maart 2015 cu a sosode un accidente, den cual un Polis na civil, despues di a sali for di Club POVA, a atropeya un mucha cu auto. Su mayan, 14 di maart, Zinnia Croes, naci na aña 2002, a fayece debi na e slanan ricibi den e desgracia. Chauffeur di e auto, un agente di Polis femenino, a admiti cu el a dal algun drinks, pero cu e no ta sinti su mes burachi.

Mesora despues di e caso, a start un investigacion di Polis, cu na opinion di e mayornan di e victima, a dura demasiado. Tambe, na final nan no tabata satisfecho cu e contenido di e rapport y pio di e veracidad y integridad di e rapport, den cual Polisnan a investiga nan mesun colega.

Famia a opta pa busca sosten di abogado mr. Sven Faarup pa acesora nan huridicamente den un proceso huridico cu nan tabata determina pa cana. Asina na October 2016 a atende un reunion cu Fiscal na Ministerio Publico, buscando mas contesta riba nan preguntanan.

Mirando cu Ministerio Publico no kier a investiga of no a mira necesidad pa persigui e chauffeur, mesora a inicia un proceso huridico na Corte Comun di Caribe Hulandes. Ley ta duna tur ciudadano e derecho, cu si nan no ta di acuerdo cu decision di Fiscal ora di investiga un caso penal, cu por apela y protesta e decision na Corte Comun. Ey tres Hues ta evalua contenido di e caso y asina tuma un decision.

E prome caso den Corte a tuma luga na October 2017, unda cu abogado y famia di e victima a purba convence e Huesnan cu Fiscal a comete un eror dor di no persigui e chauffeur. A base di e prome caso, a sigui un di dos caso na December 2017, den cual e chauffeur tambe tabata presente den sala. E polis femenino a acepta atrobe, manera el a haci semper, cu el a consumi alcohol pero no tabata burachi.

Huesnan a reuni riba e dos casonan y awe diabierna 19 di januari 2018 pa 3:30pm a informa famia cu e decision ta cu Ministerio Publico mester habri e caso bek y persigui e chauffeur Polis envolvi den e accidente fatal.

Un fecha pa tratamento di e caso ainda no ta conoci. Pa famia di Zinnia, e caso aki lo no trece nan ser keri bek, pero por lo menos nan ta sinti cu husticia lo prevalece y defende e derechonan di e victima. Diasabra mainta lo tene un rueda di prensa pa suministra mas informacion di e caso.

Comments

comments