Corte Europeo: Hulanda tin cu paga 18.5 miyon euro pa fout di Aruba y Corsou

Diahuebs siman pasa Corte Supremo Europeo (Europese Hof van Justitie) a dicta un sentencia contra Reino Hulandes den un caso cu por wordo considera historico pa motibo di e repercusionnan cu e sentencia aki lo tin pa e reparticion di responsabilidad den Reino Hulandes y e aplicacion di leynan Europeo na Aruba, Corsou, Sint Maarten, Boneiro, Saba y St. Eustatius.

Ta asina cu na aña 2017 Union Europeo a entama un caso contra Reino Hulandes pa motibo cu Gobierno di Aruba y Corsou a comete un eror causando cu Union Europeo a keda sin cobra 18.5 miyon euro na invoerrechten. Di aña 1997 pa 2000 Europa a importa lechi for di Corsou y di aña 2002 pa 2003 Europa a importa “semola” (hariña) for di Aruba sin cu a cobra invoerrechten. a importa e productonan liber di invoerrechten pa motibo cu Duana di Aruba y Corsou a duna e productonan aki e asina yama certificadonan EUR.1.

Aruba y Corsou no mester a duna e certificadonan aki pasobra e productonan aki no tabata cumpli cu e condicion principal pa por duna e certificadonan aki, esta cu e productonan ta origina for di Aruba y Corsou. E lechi y e “semola” aki tabata origina di otro pais y Aruba y Corsou a haci comosifuera e productonan ta origina na Aruba y Corsou.
Locual por wordo considera historico den e caso aki ta cu Corte Supremo Europeo no a sentencia Aruba of Corsou, of e importadonan of exportadonan encuestion, pero a pone Reino Hulandes, como miembro di Union Europeo, responsabel pa e “eror” cometi. A la bes Corte Supremo Europeo a dicta cu Reino Hulandes ta responsabel pa sigura cu ta cumpli cu leynan Europeo den su teritorionan. Particularmente e leynan cu ta regarda e Landen en Gebieden Overzee (LGO), cu ta un parti di e tratado Europeo, y e decision cu ta regarda esaki, esta e LGO-besluit ta hopi extenso y por tin repercusionan grandi.

E LGO besluit, cu por cierto ta wordo amplia y renoba otro aña, ta un documento extenso cu un sin fin di ley cu te awor no a haya mucho atencion na nos paisnan. Huristanan, academiconan pero tambe empleadonan publico cu ta atende cu e materia sa tin diferencia di opinion riba e tema, cu awor cu e sentencia di Corte Supremo Europeo ta dicidi na fabor di un interpretacion cu sigur lo tin repercusionnan enorme pa e lasonan den Reino Hulandes.
Por spera cu e sentencia aki lo fortifica e pensamento di Gobierno di Reino Hulandes cu nan tin legitimidad y deber di actua den tur parti di Reino Hulandes pa sigura cu ta cumpli cu ley. 24ora.com lo entrevista actornan relevante e dianan nos dilanti pa purba haya nan opinion riba e sentencia aki.