Corte di Apelacion lo trata asesinato di Harmond Girigorie

63

Diabierna dos siman pasa dia 7 di juni 2019, Corte di Prome Instancia a dicta sentencia den e caso penal cu Ministerio Publico a entama contra Ilbert Maduro, acusa di asesinato di Harmond Girigorie dia 16 di october 2018 banda di Julio’s Bar na San Nicolas. Fiscal a pidi pa castig’e cu 14 aña di prizon y Hues a confirma e demanda. Diabierna ultimo e acusado a apela e sentencia na Corte di Apelacion na Corsou.

Durante tratamento di e caso, Abogado Chris Lejuez a apela riba defensa propio, ya cu su cliente a sinti miedo ora cu Harmond Girigorie a bin riba dje. El a kere cu Girigorie tabata arma, pero a rechasa e ponencia aki. No tabatin prueba ni indicacion cu e victima tabatin un arma cun’e. E victima y e acusado tabatin un problema personal cu otro. E ex di e victima a bira pareha di Maduro. Y e hecho cu Girigorie continuamente tabata pasa dilanti nan cas ta tira palabra a pone cu Maduro su “fuse” a bula riba e fecha en cuestion.

Cu e apelacion aki awor, un total di tres Hues for di Corte Comun di Caribe Hulandes lo atende e caso completamente di nobo pa evalua si e sentencia di e Hues di Corte den Prome Instancia tabata corecto of si mester revisa e decision. E tipo di apelacionnan asina por sali na bentaha of tambe por ta na desbentaha di e acusado. E Huesnan por mira un angulo diferente na esun di e Hues di Aruba y por baha su castigo, pero tambe por mira e caso diferente y aumenta su castigo mas ainda. E ta un risico cu e acusado ta core ora di apela un sentencia.

Te ainda Corte Comun di Caribe Hulandes no a fiha un fecha pa tratamento di e caso. Mientrastanto e acusado ta sigui cera den KIA. El a expresa na Corte si cu e ta sinti su mes menasa eyden y cu na varios ocasion e mester a bringa pa su bida. E ta consciente cu tin hopi amigo di Harmond Girigorie eyden y cu ta haci su bida “zuur” den prizon. El a bisa cu si e keda cera den KIA, cu nan lo mat’e.