Siman pasa dia 13 di maart 2018, Corte Comun di Caribe Hulandes, bou cual ta resorta Aruba, Corsou, St. Maarten, Boneiro, St. Eustatius y Saba, a tuma un decision relaciona cu un carta di protesta cu abogado mr. Arie Swaen a manda contra nan sentencia di dia 19 di december 2017. E abogado cu a defende Ing. Oslin Boekhoudt, ex-Director di WEB, den su caso di retiro, a haya rason riba un eror cu e Huesnan a haci den nan sentencia.
Ata aki e caso di aña pasa:
Dia 8 di januari 2018 Abogado Swaen a manda un carta na Corte Comun (Hof) pidiendo si por corigi e sentencia, debi cu e tabata convenci cu e tabata fout. Dia 16 di januari 2018, abogado mr. Bryan Coffie di Bufete Go-Bik, kende hunto cu abogado mr. Lincoln “Dello” Gomez a bringa e caso pa WEB, a protesta contra e peticion di Swaen. Y siman pasa, tres Hues a repasa e peticion y e protesta y a dicidi cu abogado Swaen tin rason.
Segun e veterano den abogacia, mr. Arie Swaen, desde prome dia cu e sentencia a sali, el a menciona caba cu e ta fout. Esaki debi cu Corte a subraya varios punto den cual e ta sinti cu WEB a faya den retiro di su Director. Asina mes na final, a hinca cu e retiro tabata masha bon. Den e decision revisa, e Huesnan a cambia e frase y a inclui “Het Hof acht deze gang van zaken dermate onzorgvuldig jegens Boekhoudt dat, anders dan het GEA heef geoordeeld, reeds om die redenen het ontslag als kennelijk onredelijk moet worden aangemerkt”.
Aunke cu a corigi e frase y ta subraya cu e retiro no a bay bon, toch e Huesnan ta laga OJ Boekhoudt como e partido cu a perde e caso, cu mester paga e gastonan di e caso y cu no ta dune e “daño y perhuicio” cu el a pidi. Esaki pasobra cu Corte Comun ta considera cu e 6 lunanan cu a cobra despues di e caso ta suficiente caba. Mester menciona cu Boekhoudt a solicita un “schadevergoeding” di Afl. 1.496.328,=.
Click aki pa lesa e decision di Corte Comun di Caribe Hulandes
“E caso a termina tambe pa nos, no lo sigui mas den casacion”, asina abogado mr. Arie Swaen a termina bisando.
