Corte: Colegio EPI tin rason di kita docente cu ta traha como “stripper”

6628

Corte a confirma e decision di directiva di Educacion Profesional Intermedio (EPI) pa retira un docente, Germain Navarro, pa violacion di reglanan di trabou. Abogado Griffith a defende e docente, cu porcierto tabata nomina pa “Appel di Oro” algun aña pasa, mientras e departamento huridico di Gobierno a defende EPI y Directie Onderwijs. E sentencia cu a cay na fin di november ultimo ta papia un idioma cla, cu retiro inmediato di e docente aki tabata na su luga

E problemanan cu e docente a cuminsa for di aña 2016, ora cu el a start un relacion amoroso cu un studiante, el a culmina na inicio di e aña aki despues di diferente otro incidente.

Ora cu directiva a haya sa di su relacion amoroso, a sinta cu e docente y a yega na algun palabracion, esta cu e no mag duna e hoben les y nan asunto priva mester keda pafo di cura di scol. Esaki ta motibo cu e situacion aki no a hunga un rol directo den e retiro. 

E retiro ta basa riba e hecho cu:

• Mas cu un biaha el a viola su debernan como docente y pa esaki tin keho of reclamo di seis studiante riba comportacion di e docente pa stalking (di su ex) riba rednan social;

•Intimidacion como docente contra e pareha nobo di su ex;

•No a sigui instruccionnan di directiva; uzo di droga;

•A busca contacto no desea y personal;

•Tentamento di studiante;

•A permiti tentamento sin cu el a interveni;

•Uzo di un lenguahe vulgar pa cu un studiante;

•Side job como stripper;

•Sexual harrasment;

•A tuma contacto cu studiantenan despues di oranan di scol pa cosnan cu no tin di haber cu scol.

•Y por ultimo, el a muda y no a duna su adres nobo. Esaki a stroba directiva di entreg’e un carta di medidanan cu a tuma contra dje.

E prome advertencia el a haya na maart 2017, ora cu a informe cu su actuacion pa cu studiante y su coleganan ta en pugna cu reglanan di scol y codigo di conducta di un docente. Finalmente na februari 2019 el a ricibi castigo disciplinario di retiro entrante 27 di februari 2019. 

Despues cu e relacion cu e studiante a finalisa, e docente a sigui molesti’e tanto na scol como riba rednan social, busca contacto indesea. Segun e docente, e tabata trat’e bon ya cu e tabata kier nan bolbe cu otro y e  contacto tabata pa entreg’e su cosnan. E studiante tambe a declara cu durante nan relacion, e docente, kende ta practica bodybuilding y ta campeon muay thai kickboxing, a maltrat’e fisicamente. Como prueba el a mustra e plekinan blauw cu a keda marca riba su curpa.

Cu e amigo nobo di e studiante tambe tabatin algun problema, aunke na scol mes no tabatin un confrontacion. E docente tabata mira e hoben aki cu mirada intimidante. Pero tambe den klas e tabata papia cu e hobennan di su relacion kibra y cu e studiante tabata esun cu a traicion’e. Apesar cu e steroid ta wordo uza pafo di scol, esaki tin efecto riba su actitud, principalmente door di e uzo prolonga. Steroid ta adictivo y ta afecta e comportacion, manera cu a pasa cu e docente kende ta agresivo, ta cambia di beis lihe, ta grita colega y studiantenan, pero tambe ta dal cu mokete riba mesa, y ta perde pasenshi. Di e forma aki e no por cumpli cu su deber debidamente.  

E no a yuda studiantenan vulnerabel di dje, kendenan tabatin pensamento di suicidio.E tabata tin un sidejob tambe como stripper, y directiva ta haya cu un docente tin e tarea pa educa, di ta un ehempel y haciendo esaki contra pago e no a actua manera ta exigi di un ambtenaar. Tur esaki ta haci cu el a viola e codigo di un docente y a mancha e profesion di docente y enseñansa en general.

Corte a rechasa su obheccion contra su retiro bisando cu directiva tabatin motibo hustifica pa tuma tal decision!