Den un decision di Corte ta menciona cu pais Aruba a actua di forma ilegal door di no duna parehanan di mesun sexo e posibilidad pa registra nan union, tanten cu no habri e posibilidad pa nan por contrae matrimonio.
Stichting Orguyo hunto cu dos dama a cuminsa e caso aki. Nan a demanda den e procedura, entre otro, pa Corte dicidi cu e actual ley di matrimonio – cu ta permiti solamente pa un homber casa cu un muhe – ta en pugna cu constitucion y statuto y tambe ta en pugna cu tratadonan internacional cu ta valido na Aruba (manera entre otro Tratado Europeo pa Derecho Humano EVRM).
Tambe a demanda pa Corte condena pais Aruba pa adapta e ley riba e punto aki. Pa finalisa, a pidi pa condena pais Aruba pa introduci “partnerschap” registra mientras cu no ta posibel pa parehanan di mesun sexo por casa.
Loading…
Reload document 
Open in new tab Corte a dididi cu Hues no tin e autoridad pa condena pais Aruba pa introduci cierto leynan of adapta un ley existente. Pues no por condena pais pa habri matrimonio pa parehanan di mesun sexo of pa introduci registracion di “partnerschap”.
Pero for di un veredicto di Europese Hof voor de Rechten van de Mens (EHRM) ta bisa si cu pais ta culpabel na discriminacion door di permiti parehanan heterosexual casa pero no tin e posibilidad ey pa parehanan di mesun sexo. Corte ta bisa cu banda di e balor emocional cu un matrimonio ta ofrece, e ta ofrece tambe tur sorto di bentaha (entre otro riba tereno di derecho di pensioen, ley fiscal y ley di herencia) cu parehanan heterosexual si tin y parehanan di mesun sexo no.
Sinembargo, Corte Europeo ta bisa cu paisnan cu ta anexa na EVRM no mester kita e desigualidad ey door di habri e posibilidad pa parehanan di mesun sexo. Nan por drecha e desigualidad ey door di ofrece parehanan di mesun sexual un alternativa similar, manera un partnerschap registra.
E ariba menciona ta nifica cu un pais por scoge pa habri e posibilidad di matrimonio pa parehanan di mesun sexo. Pero si un pais no haci esaki y no ofrece un otro alternativa, e ora e ta actuando ilegal. P’esey cu Corte den e caso aki a dicta cu pais ta actua ilegal door cu no a introduci e posibilidad cu un pareha di mesun sexo por registra nan union, mientras cu no tin e posibilidad pa nan casa.
E proposicion pa cambio di ley tin tres aña pega caba na Parlamento di Aruba y te ainda no tin un claridad si ta acepta e cambio of no. E ora ta bisa cu pais ta actual ilegal door di pospone introduccion di esaki.
