Corte di Prome Instancia diahuebs, 21 di november, 2019, a tuma e decision den e caso cu Mahogany a cuminsa contra pais Aruba relaciona cu un pida tereno enfrente di Phoenix Resort. Hecho ta cu nan demanda contra Gobierno, y Aruba Birdlife Conservation (ABC) a uni su mes den e caso aki na banda di Gobierno, a keda rechasa.
Dia 28 di november, 2014 Mahogany a haci peticion pa un tereno, di 2140 M2 na Palm Beach pa construi un compleho di apartamento. Tres biaha den 2017 e desaroyado a pidi pa prolonga e opcion di derecho riba e parcela y finalmente a bay di acuerdo na augustus, 2017.
Tabatin conseho negativo pa otorga e tereno aki pa motibo cu un sistema di rioolering cu ta conecta e hotelnan cu e planta di purificacion di awa ta pasa eyriba. Y si mester otorga esaki toch, mester move e conexion, cual lo costa 115 mil florin y esun cu a pidi e tereno mester cubri e gasto aki. Na october, 2015 e mandatario encarga a bay di acuerdo, basta cu e cumpli cu e condicion,pa otorga e tereno.
Dia 16 di juli, 2017, Mahogany a cumpli cu e condicionnan pa haya e derecho di erfpacht pero no tabatin e documentonan necesario cu e tereno a wordo midi. Na maart a pidi kadaster pa midi e tereno y nan a haya contesta na september, 2018. Den e carta aki ta bisa cu su peticion pa prolonga e derecho di opcion no ta wordo honra. E motibo ta cu e ta cay den area berde protegi y ta en pugna cu e ROP.
Mahogany den e documentonan entrega na Corte a pidi pa ordena pais Aruba pa denter di 30 dia despues cu seya e veredicto, pasa over pa midi e percela en cuestion; prohibi pais Aruba di otorga na otronan e tereno en cuestion (mientras cu no tin un decision definitivo den bodemprocedure). Y tambe a rechasa cu e opcion cu el a haya ta cay bou di “afscheidsbeleid”.
Corte a bisa cu e organisacion ABC tin motibo y derecho pa ta partido den e caso aki, mirando e tareanan di nan describi den nan Statuut, pa proteccion di e area di parhanan. Den nomber di e pueblo nan ta percura pa cuida cu areanan berde ta keda berde di berdad. Den e caso aki nan a wordo representa pa Abogado mr. Rep.
E Abogado a trece dilanti cu e rapportnan entrega door di Mahogany no ta sirbi, e ta en pugna cu loke pais Aruba a trece dilanti durante e prome tratamento. Niun caminda ta mira cu a tene cuenta cu e mapa kadastral di DIP.
Corte a conclui cu e tereno en cuestion ta den area berde, mirando declaracion di Robert Kip den Corte kende a bisa cu e mapanan cu el a mustra ta diseñonan den concepto y no ta procedente di e mapa di ROP. Di e mapa di ROP por deduci cu e tereno aki ta cay completamente den e area berde. Di e rapport traha door di ACE, ta mustra cu no a haci un debido investigacion na e ubicacion di e tereno y tampoco un estudio di calidad riba e efectonan di construccion riba e flora y fauna existente. Mas bien a traha un rapport cu ta beneficioso pa esun cu a duna nan e ordo di trabou. P’esey Corte no a tuma e rapport aki na serio.
Tur esaki a conduci cu pa awor e decision di Corte ta cu e percela ta cay completamente den area berde (y aki poco tempo den “natuurgebied), pa cual Mahogany no tin motibo pa pidi pa Kadaster midi e tereno aki. Cu esey, e prome peticion a keda rechasa. E di dos demanda no tin necesidad pa bay riba dje, pasobra Gobierno mes a bisa cu nan no ta bay otorga esaki.
Como e partido cu a perde e caso, a condena Mahogany den pago di e gastonan.
