Diabierna den oranan di merdia Corte di Prome Instancia a dicta sentencia den caso contra Franklin Sanchez, kende dia 30 di mei ultimo a kap Marlon Stennett, kende a permiti y para wak con su tata a abusa sexualmente di e yiu di e acusado Sanchez.
E sentencia aki tabata e prome di e aña’ki y a tuma luga den oranan di merdia. Presente na e ocasion aki tabata e abogado mr. Canwood y esposa di e acusado. E señora a splica cu e sentencia a trece un alivio pa famia, ora cu Hues a anuncia cu el a baha e castigo di 10 aña pa 5 aña. Nan ta spera di tur curason cu Fiscal no apela e decision aki y acepta cu cinco aña ta suficiente pa e acto cu Sanchez a comete. Un biaha mas e señora a sigura cu niun momento tabata intencion di su casa Franklin Sanchez pa mata e agresor, cu tabata un amigo di e yiu muhe, sino pa siñe un les.
Decision
Sanchez tabatin tres acusacion contra dje: Asesinato premdita; homicidio of maltrato pisa cu morto como consecuencia.Hues na momento di lesa e sentencia a bisa cu e acusado a admiti di a maltrata Marlon Stennett cu machete na rudia y despues el a fayece.
Hues a bisa cu el a studia e caso profundamente y mester a contesta preguntanan manera con pa califica e actuacion di e acusado y con el a actua na momento di e sucedido. Su conclusion tabata cu e no a actua intencional ora cu el a kap Stennett cu e machete na su pia, ya cu normalmente lo no fayece di esaki. Otro lo tabata e caso si el a kap’e na su pecho unda tin organonan masha importante. Na di dos luga, Hues a bisa cu e no tabata trankil na momento di e sucedido, pasobra ainda e tabata afecta emocionalmente pa loke a pasa cu su yiu muhe na man di Stennett y su tata.
Hues a conclui cu su intencion no tabata pa mata y e mes a bisa na diferente ocasion cu su intencion no tabata pa mata pero dun’e un les. Basa riba tur e ariba menciona, Hues ta conclui cu e acusacion cu por keda proba ta maltrato pisa cu morto como consecuencia.
Pa loke ta e castigo, a tene cuenta cu diferente aspecto: A tene cuenta cu e contexto den cual e cos a sosode, e no por a pensa “helder”; emocion a hunga un rol debi na loke cu a pasa cu su yiu cu a wordo viola. Na di dos luga a tene cuenta cu el a entrega su mes mesora; el a asumi su responsabilidad y nunca antes e tabata envolvi cu husticia.
Pa loke ta e castigo mes, Hues a tene cuenta cu casonan similar y asina el a yega na uno castigo cu ta hopi mas abou di loke tabata demanda di Fiscal, esta cinco aña. Por a compronde cu famia a keda toch contento, pasobra nan ta compronde cu un delito a wordo cometi pero cu esaki a wordo causa pa loke a pasa cu e yiu. E castigo di 5 aña ta nifica kitando e reduccion pa bon conduco, e lo mester sinta tres aña y 7 luna, y kitando e tempo cu el a pasa den detencion preventivo, shete luna, ta nifica cu ta keda un castigo di 3 aña cu e mester sinta ainda.